ދުނިޔޭގެ ވިޔަފާރީގެ ހަމަނުޖެހުމުގައި ޗައިނާގެ އިގްތިސާދީ ކުރިއެރުން މަޑުޖެހިދާނެ ކަމުގެ އިންޒާރު އައިއެމްއެފްގެ 2024 ވަނަ އަހަރުގެ އިގްތިސާދީ މާރެސްގައި ފާޅުކޮށްފިއެވެ.
އިންޓަނޭޝަނަލް މަނިޓަރީ ފަންޑުން ޗައިނާގެ އެންމެ ފަހުގެ ވޯލްޑް އިކޮނޮމިކް އައުޓްލުކް ރިޕޯޓުގައި ހާމަކޮށްފައިވާ ގޮތުގައި، 2024 ވަނަ އަހަރު ޗައިނާގެ އިގްތިސާދީ ކުރިއެރުން ލަފާ ކުރާ މިންވަރު ވަނީ 4.8 ޕަސެންޓަށް ދަށްކޮށްފަ އެވެ.
ޗައިނާގައި އަދިވެސް ޕްރޮޕަޓީ ސެކްޓަރުގައި ދިމާވަމުންދާ ދަތިތަކާއި ކޮންސިއުމަރ ސްޕެންޑިންގ ދަށްވުމުން ހީނަރުވެފައިވުމުން ޗައިނާގެ އިގްތިސާދަށް ދިރުމެއް ދިނުމަށް ރައީސް ޝީ ޖިންޕިންގެ ސަރުކާރުން މަސައްކަތް ކުރި ނަމަވެސް އިގްތިސާދީ ގޮންޖެހުންތައް އެގޮތުގައި ހުރިކަމަށް ފާހަގަ ކޮށްފައި ވެއެވެ.
ކުރިއާ އަޅައި ބަލާއިރު، 2025 ވަނަ އަހަރު ޗައިނާގެ އިގްތިސާދު 4.5 ޕަސެންޓްގައި ކުރިއަރާނެ ކަމަށް އައިއެމްއެފް އިން ލަފާކުރެއެވެ.
އެތެރޭގެ އިގްތިސާދީ މައްސަލަތަކުގެ އިތުރުން ޗައިނާ، އެމެރިކާ އަދި އީޔޫއާ ދެމެދު ވިޔަފާރީގެ ކޯޅުންތައް އިތުރުވަމުންދާތީ، ޗައިނާގެ އިގްތިސާދީ ޕްރެޝަރުތައް ވަނީ އިތުރުވެފައެވެ.
މި ފަރާތްތަކުގެ އިގްތިސާދުތަކުގެ މެދުގައި ބަދަލު ހިފުމަށް ޓެރިފް ބޮޑުކުރުމުން ދުނިޔޭގެ ވިޔަފާރިއަށްވެސް ދަތިތަކެއް ދަނީ ކުރިމަތިވަމުން ކަމަށް ފާހަގަ ކޮށްފައި ވެއެވެ.
އެގޮތުން ދުނިޔޭގެ އިގްތިސާދީ އުފެއްދުންތެރިކަން ދަށްވުމާއި އިންފްލޭޝަންގެ ޕްރެޝަރުތައް އިތުރުވުމާއެކު ފުޅާ ދާއިރާއެއްގައި އިގްތިސާދީ އަސަރުތަކެއް ކުރާނެ ކަމުގެ އިންޒާރު އައިއެމްއެފްގެ ޑެޕިއުޓީ ޑިރެކްޓަރު ގީތާ ގޮޕީނާތު ދެއްވަ އެވެ. އޭނާ ފާހަގަކުރެއްވި ގޮތުގައި ދުނިޔޭގެ އިގްތިސާދީ ހަމަޖެހުން ބަރޯސާވެފައިވަނީ ދޭދޭ ޤައުމުތަކުން އެއްބާރުލުން ދޭ ވިޔަފާރީގެ ގުޅުންތަކާއި ޚާއްސަކޮށް އެމެރިކާއާއި ޗައިނާއާ ދެމެދު އޮންނަ ވިޔަފާރީގެ ގުޅުންތަކުގެ މައްޗަށެވެ.
ޕްރޮޓެކްޝަނިސްޓް ފިޔަވަޅުތަކުގެ ސަބަބުން ދުނިޔޭގެ އިގްތިސާދީ ކުރިއެރުން ބަލިކަށިވުމުގެ ބިރު އޮތް ކަމަށާއި ހުޅުވާލާފައިވާ ވިޔަފާރި ހިންގުމުގެ ސިޔާސަތުތަކުގެ ބޭނުންތެރިކަން އައިއެމްއެފްގެ ރިޕޯޓުގައި ފާހަގަ ކޮށްފައި ވެއެވެ.
