އެމެރިކާއިން ބުނާ ގޮތުގައި އެގައުމުގެ ޓެކްނޮލޮޖީ އަދި ޑިފެންސް ދާއިރާތަކަށް އޮތް އެންމެ ބޮޑު ނުރައްކަލަކީ، ޗައިނާގެ ޖާސޫސީ ހަރަކާތެވެ. ޗައިނާގެ ޖާސޫސީ މަސައްކަތްތައް ޚާއްސަކޮށް ސެމީކޮންޑަކްޓަރ އަދި ޑިފެންސް ދާއިރާއަށް އަމާޒުކުރުމުން، އެމެރިކާގެ މުހިންމު ޓެކްނޮލޮޖީތަކަށް ސެކިއުރިޓީ ގޮންޖެހުންތައް ކުރިމަތިވެފައި ވެއެވެ.
އެމެރިކާއިން ދޭތެރޭ ދޭތެރޭން ޖާސޫސްކުރުމުގެ ތުހުމަތުގައި ޗައިނާ ރައްޔިތުންގެ ޝަރީޢަތް ކުރެއެވެ. އެގޮތުން، ސެމީކޮންޑަކްޓަރ އިކުއިޕްމަންޓް ގަވާއިދާ ހިލާފަށް ބެއިޖިންގއަށް އެކްސްޕޯޓް ކުރި ކަމަށް ތުހުމަތު ކުރެވޭ ޗައިނާގެ ރައްޔިތެއް ކަމަށްވާ ޗެން ލިން ފަދަ ފަރާތްތަކުގެ މައްސަލަތަކުން އެމެރިކާގެ ނާޒުކު އާ އީޖާދީ އުފެއްދުންތަކަށް ވަދެގަނެ، އެމެރިކާގެ އެކްސްޕޯޓް ކޮންޓްރޯލްތައް ފަހަނައަޅައި ދިއުމަށް ޗައިނާއިން މަސައްކަތް ކުރާކަމަށް އެމެރިކާއިން ފާހަގަ ކުރެއެވެ.
އެމެރިކާގެ ބްލެކްލިސްޓްގައި ހިމެނޭ ޗައިނާގެ ކުންފުންޏަކަށް ސެމީކޮންޑަކްޓަރ ގައި ބޭނުންކުރާ ވޭފަރ ކަޓިން ޓެކްނޮލޮޖީ ހޯދުމަށް ޗައިނާގެ މީހާ ކޮށްފައިވާ މަސައްކަތުން އެމެރިކާގެ ފިކުރީ މުދާ ހިމާޔަތްކޮށް ގައުމީ ސަލާމަތަށް ކުރިމަތިވާ ނާޒުކު ކަން ހާމަވެފައި ވެއެވެ. މިކަން އިތުރަށް ކަންބޮޑުވާ ކަމަކަށް ވަނީ، ނާޒުކު އަސްކަރީ ޓެކްނޮލޮޖީއާ ގުޅުން ހުރި މައްސަލަތައް ފާހަގަ ކުރެވިގެން ދިއުމުންނެވެ.
އެފަދަ އަނެއް މައްސަލައަކީ، މިސައިލް ގައިޑެންސް އާއި ރާޑަރ ސިސްޓަމްތަކުގައި ބޭނުންކުރާ މޮނޮލިތިކް މައިކްރޯވޭވް އިންޓަގްރޭޓެޑް ސާކިޓްސް (އެމްއެމްއައިސީ) ޗައިނާއަށް އެކްސްޕޯޓް ކުރުމުން އިލެކްޓްރިކަލް އިންޖިނިއަރު ޝިހް ޔީ-ޗީ ކުރިމަސައްކަތުން އޭނާއަށް އައިސްފައިވާ ޙުކުމެވެ.
މި އިންޖިނިއަރު ވަނީ، ވަގަށް ނަގާފައިވާ ޓެކްނޮލޮޖީތައް އަސްކަރީ ސާމާނުގައި ބޭނުން ކުރުމަށް ޗައިނާއަށް ސަޕްލައި ކޮށްފައެވެ.
އަނެއް މައްސަލައަކީ މިސައިލް ޑިޓެކްޝަން ސިސްޓަމްތަކުގެ މައުލޫމާތު ވަގަށް ނަގައި ޗައިނާއަށް ސަޕްލައި ކުރިކަމަށް ތުހުމަތު ކުރެވޭ ދިރާސާވެރިއަކަށް އެމެރިކާއިން ޙުކުމް ކުރުމެވެ.
އެފްބީއައިގެ ޑިރެކްޓަރު ކްރިސްޓޮފަރ ވްރޭ ފާހަގަކުރެއްވި ގޮތުގައި ޗައިނާގެ ޖާސޫސީ މަސައްކަތާ ކުރިމަތިލުމަށް އެމެރިކާގެ ޖާސޫސީ އިދާރާތައް ވަރަށް އަވަދިނެތި އުޅެން ޖެހެއެވެ.
އަދި ޖާސޫސީ އިދާރާތަކުން، ކޮންމެ 12 ގަޑިއިރަކުން ޗައިނާގެ ޖާސޫސީ މަސައްކަތާ ދެކޮޅަށް ތަހުގީގެއް ފަށަން ޖެހޭ ކަމަށް އޭނާ ވިދާޅުވެއެވެ. މިއީ ޗައިނާއިން ދިމާވާ ގޮންޖެހުމުގެ ބޮޑުކަމާއި ބާރުގަދަކަން ހާމަކޮށްދޭ ކަމެކެވެ.
ޗައިނާއިން ދަނީ ބެއިޖިންގއަށް މަސައްކަތް ކޮށްދޭނެ މެދުވެރި ކުންފުނިތައް ހޯދުމުން ފެށިގެން ޚާއްޞަ ދިރާސާވެރިންނާއި ސައިންޓިސްޓުން ހޯދައި އެމެރިކާގެ ޓެކްނޮލޮޖީއަށް ފާރަވެރިވަމުން ކަމަށް އެމެރިކާ ބުނެއެވެ.
