ޕާކިސްތާނުން އުރަމަތީގެ ކެންސަރަށް ހޭލުންތެރިކުރުމަށް އެއް މަސް ދުވަހުގެ ޕްރޮގްރާމެއް ހިންގައިފިއެވެ. އުރަމަތީގެ ކެންސަރަށް ހޭލުންތެރިކުރުމުގެ މިއަހަރުގެ މަސް ދުވަހުގެ ޕްރޮގްރާމް ނިންމާލީ ޕާކިސްތާނުގެ ޔުނިވާސިޓީތަކުން އުރަމަތީގެ ކެންސަރުގެ މުހިންމު މައްސަލައަށް ހައްލެއް ހޯދުމަށް ބާރުއަޅަމުންނެވެ.
ޖިނާހު ސިންދު މެޑިކަލް ޔުނިވާސިޓީ (ޖޭއެސްއެމްޔޫ) އިން އެކަމަށް ބޭއްވި ކޮންފަރެންސެއްގައި ޔުނިވާސިޓީގެ ވައިސް ޗާންސެލަރު ޕްރޮފެސަރު އަމްޖަދު ސިރާޖް މެމޮން ވަނީ އަންހެނުންގެ ފުރާނަ ސަލާމަތްކުރުމުގައި މި ބަލި އަވަހަށް ދެނެގަތުމަށާއި އަންހެނުން ހޭލުންތެރިކުރުމުގެ މުހިންމުކަމަށް އަލިއަޅުވާލައްވާފައެވެ.
ކޮންޓިނިއުއިން މެޑިކަލް އެޑިއުކޭޝަން (ސީއެމްއީ) އާއި ޖިނާހު ޕޯސްޓްގްރެޖުއޭޓް މެޑިކަލް ސެންޓަރު (ޖޭޕީއެމްސީ) އާއި ޕާކިސްތާން އިސްލާމިކް މެޑިކަލް އެސޯސިއޭޝަން (ޕީއައިއެމްއޭ) އާއި ގުޅިގެން ޖޭއެސްއެމްޔޫ އިން އިންތިޒާމްކުރި ސެމިނާގައި ވާހަކަ ދެއްކި ފަރާތްތަކުން ވަނީ، އަންހެނުން ވަގުތުން ސިއްހީ އެހީތެރިކަން ހޯދުމުގެ މުހިންމުކަން ފާހަގަކޮށްފައެވެ.
ސީއެމްއީގެ ޑިރެކްޓަރު ޑރ.ރާހަތު ނާޒް ފާހަގަކުރެއްވި ގޮތުގައި އުރަމަތީގެ ކެންސަރަކީ ސިއްހީ ގޮތުން ޕާކިސްތާންގައި ބޮޑުވަމުން އަންނަ މައްސަލައެކެވެ. ނަމަވެސް، އެކަން އަވަހަށް ފާހަގަކުރެވިއްޖެނަމަ އެއީ، ފަރުވާ ކުރެވޭނެ ކަމެއް ކަމަށާއި، މިއީ ލަދުން ތިބެގެން، ނުވަތަ ހޭލުންތެރިކަން ކުޑަކަމުން އިތުރަށް ނުރައްކާ ވެދާނެ ކަމެއް ކަމަށް ފާހަގަ ކުރައްވާފައެވެ.
