ޗައިނާގެ އޮންލައިން މާކެޓްޕްލޭސް ޓެމޫގެ ތަހުގީގެއް ޔޫރަޕިއަން ޔޫނިއަނުން ފަށައިފި އެވެ. މި ތަހުގީގު ކުރިއަށް ގެންދަނީ ޔޫރަޕިއަން ކޮމިޝަންގެ ޑިޖިޓަލް ސާވިސަސް އެކްޓްގެ ދަށުން ނެވެ. މިއީ 27 މެމްބަރުންގެ ޖަމާއަތުގައި ހިންގާ އޮންލައިން ވިޔަފާރިތަކުގެ މައްޗަށް ޗައިނާގެ އަގުހެޔޮކޮށް މުދާ ވިއްކާ ޓެމޫ އެޕަށް ފުޅާ ބާރުތަކެއް ލިބޭތީ އެކަމާ ދެކޮޅަށް ހިންގާ ތަހުގީގެކެވެ.
ޓެމޫއާ ދެކޮޅަށް އީޔޫގެ ގަވާއިދުތަކާ ޚިލާފްވެފައިވާކަމުގެ ކުށް ސާބިތުވެއްޖެ ނަމަ އެކުންފުންޏަށް ދުނިޔޭގެ އެކި ހިސާބުން ލިބޭ އަހަރީ އާމްދަނީގެ ޖުމުލަ ބަލައި އޭގެ 6 ޕަސެންޓުން ޖޫރިމަނާ ކުރެވިދާނެ ކަމަށް އީޔޫގެ ފަރާތްތަކުން ބުނެއެވެ.
ޓެމޫ ޕްލެޓްފޯމްގައި ގަވާއިދާ ހިލާފަށް ތަކެތި ވިއްކުން ހުއްޓުވުމަށް ކުރާ މަސައްކަތުގެ އިތުރު އެ އެޕާ ގުޅޭ މައުލޫމާތު ފޯރުކޮށްދިނުމަށް ފާއިތުވި މަސްތަކުގައި އީޔޫގެ ބައެއް ހިސާބުތަކުގައި ވަނީ ޓެމޫއަށް އެދިފަ އެވެ. އަދި "ކޮންސިއުމަރ ޕްރޮޓެކްޝަންއާއި ޕަބްލިކް ހެލްތު އަދި ޔޫޒަރުންގެ ސަލަމަތާއި ދުޅަހެޔޮކަމާ ގުޅޭ ނުރައްކާތަކަށް ކުރިމަތިލުމަށް އަޅާ ފިޔަވަޅުތަކާ" ބެހޭ މައުލޫމާތު ހޯދުމަށް ވެސް އެދިފައިވެ އެވެ.
ޓެމޫގެ ޖަވާބުތަކަށް ބިނާކޮށް އެ ކޮމިޝަނުން ނިންމައިފައި ވަނީ ފުޅާދާއިރާގެ ތަހުގީގެއް ފެށުމަށެވެ. މި ތަހުގީގުގައި އީޔޫގައި "ޤަވާއިދާ ޚިލާފު އުފެއްދުންތައް ވިއްކުން ހުއްޓުވުމަށް" ޓެމޫ އެޕުން ކުރާ މަސައްކަތްތައް ވަޒަންކުރާނެ ކަމަށާއި އޭގެ ތެރޭގައި ކުރިން ގަވާއިދާ ޚިލާފަށް ތަކެތި ވިއްކާފައިވާ އަދި "ކުރިން ސަސްޕެންޑްކޮށްފައިވާ ވިޔަފާރިވެރިންނަށް އަލުން ހުއްދަ ދިނުން" ހަނިކުރުމަށް ކުރާ މަސައްކަތްތައް ވެސް ބަލާނެއެވެ. އަދި ޓެމޫ ބޭނުން ކުރުމުގެ ސަބަބުން "މީހެއްގެ ޖިސްމާނީ އަދި ނަފްސާނީ ދުޅަހެޔޮކަމަށް ނޭދެވޭ އަސަރުތަކެއް ކޮށްފާނެ" ފަދަ ކަންކަމަށް އަޅާ ފިޔަވަޅުތައްވެސް ވަޒަން ކުރާނެއެވެ.
ޓެމޫގެ ޕްލެޓްފޯމްގައި ކޮންޓެންޓާއި ޕްރޮޑަކްޓްތައް ޔޫޒަރުންނަށް ރެކޮމެންޑް ކުރެވޭ ގޮތް ވެސް ތަހުގީގު ކުރާނެ އެވެ. އަދި ޓެމޫ އިން ރިސާޗަރުންނަށް އެ ކުންފުނީގެ ޑޭޓާއަށް އެކްސެސް ދޭ ގޮތްވެސް ބަލާނެވެ.
