އިނގިރޭސި ޕްރިމިއަރ ލީގުގައި ވަރުގަދަ މެންޗެސްޓަރ ސިޓީ އާއި އާސެނަލް ރޭ ބަލިވެއްޖެއެވެ.
މެންޗެސްޓަރ ސިޓީ ބަލިވީ ރަށުން ބޭރުގައި ބޯންމައުތާ ވާދަކޮށް 2-1 އިންނެވެ. ބޯންމައުތުގެ ދަނޑުގައި ކުޅުނު މިމެޗުގައި އެޓީމުން ލީޑް ނެގީ މެޗުގެ 9 ވަނަ މިނެޓުގައި އެންޓޮއިން ސިމެންޔޯ ކާމިޔާބު ކުރި ލަނޑުންނެވެ. ލީޑް ފުޅާ ކުރީ 64 ވަނަ މިނެޓުގައި އިވަނިލްސަންގެ ލަނޑުންނެވެ. ސިޓީގެ ހަމައެކަނި ލަނޑު 82 ވަނަ މިނެޓުގައި ކާމިޔާބު ކޮށްދިނީ ޖޮސްކޯ ގްވަޑިއޯލްއެވެ.
މެޗުގެ އެންމެ ފަހު 10 މިނެޓުގައި ސިޓީއިން ވަނީ ލަނޑެއް ޖެހުމަށް ވަރަށް ބޮޑަށް މަސައްކަތް ކޮށްފައެވެ. މިގޮތުން ފޯވާޑް އާލިން ހާލަންޑް ފޮނުވާލި ހަމަލާއެއްގެ ހުރަހަކަށްވީ ބޯންމައުތު ގޯލުގެ އަރިމަތީ ދަނޑިއެވެ. އޭގެފަހުން ފިލް ފޯޑެން ތިރިތިރިން ފޮނުވާލި ބާރު ހަމަލާއެއް ދިޔައީ ގޯލުގެ ދަނޑިއާ އިންޗިއެއްހައި ކައިރިންނެވެ.
މިމެޗުން ސިޓީ ބަލިވުމާއެކު، ޕްރިމިއަރ ލީގުގައި މިސީޒަނުގައި ބަލިނުވެ ސިޓީއިން ދަމަހައްޓަމުން ދިޔަ ރެކޯޑް ނިމުމަކަށް އައީއެވެ.
ލީގް ޗެމްޕިއަންކަން ހޯދުމަށް މިފަހަރު ވަރަށް ބޮޑަށް ތައްޔާރުވެގެން ސީޒަނާ ކުރިމަތިލި އާސެނަލް ރޭ ބަލިވީ ނިއުކާސަލް އަތުން 1-0 އިންނެވެ. ހަމައެކަނި ލަނޑު މެޗުގެ 12 ވަނަ މިނެޓުގައި ކާމިޔާބު ކޮށްދިނީ ސްވިޑަންގެ ފޯވާޑް އެލެގްޒެންޑާ އިސާކްއެވެ.
ސިޓީ އާއި އާސެނަލް މޮޅުވުމުގެ ފައިދާ ނެގީ ވާދަވެރި ލިވަޕޫލުންނެވެ. ފަހަތުން އަރައި ބްރައިޓަން 2-1 އިން ބަލިކޮށް ތާވަލުގެ އެއްވަނައަށް ލިވަޕޫލް ރޭ ވަނީ ޖެހިލާފައެވެ. އެއްވަނައިގައި ލިވަޕޫލް އޮތީ 25 ޕޮއިންޓާއެކުއެވެ. ދެވަނައިގައި ސިޓީ އޮތީ 23 ޕޮއިންޓާއެކުއެވެ. އާސެނަލް ހަތަރުވަނައިގައި އޮތީ 18 ޕޮއިންޓާއެކުއެވެ.
ޕްރިމިއަރ ލީގުގައި މިރޭ 3 މެޗް ކުޅޭނެއެވެ. އޭގެތެރެއިން އެންމެ ފާހަގަ ކޮށްލެވެނީ ޗެލްސީ އާއި މެންޗެސްޓަރ ޔުނައިޓެޑް ބައްދަލު ކުރަން ހަމަޖެހިފައިވާ މެޗެވެ. މިމެޗް ފަށާނީ ރާއްޖޭ ގަޑިން 21:30 ގައެވެ.
