އިސްލާމިކް ޖިހާދުން މިއަދު އިއުލާން ކުރި ގޮތުގައި ޒަޔަނިސްޓުން ޣައްޒާ މަތިން އުދުއްސަމުން ގެންދިޔަ ދެ ޑްރޯނެއް ވައްޓާލައިފިއެވެ. ދެ ޑްރޯންވެސް ވައްޓާލާފައި ވަނީ ތަފާތު ދެ އޮޕަރޭޝަނުގައެވެ.
އިސްލާމިކް ޖިހާދުގެ އަސްކަރީ ވިންގު ކަމަށްވާ އަލްޤުދުސް ބްރިގޭޑުން ބުނީ އެ ފަރާތުން ވައްޓާލި ޑްރޯނަކީ، ޣައްޒާ ސިޓީގެ މަތީގައި ޒަޔަނިސްޓުން ޖާސޫސީ މިޝަންތައް ކުރިއަށް ގެންދިއުމަށް ބޭނުންކުރި ޑްރޯނެއް ކަމަށެވެ.
އަނެއްކޮޅުން ޝުހަދާއުލް އަޤްޞާ ބްރިގޭޑުން ބުނެފައި ވަނީ، އިރުމަތީ ޣައްޒާ މަތިން އުދުހުނު ޑްރޯނެއް ޖާސޫސް ކުރަމުން ދަނިކޮށް އެމީހުން އޭތި ވައްޓާލާފައިވާ ކަމަށެވެ.
މިއަދު ރަފަޙްގައި ޙަމާސްއާއި އިސްލާމީ ޖިހާދުންވެސް ވަނީ ޒަޔަނިސްޓުންނާ ދެކޮޅަށް ވަރުގަދައަށް ކުރިމަތިލާފައެވެ. ޒަޔަނިސްޓުން ވަނީ އެމީހުންގެ 601 ވަނަ ބެޓޭލިއަންގެ އޮފިސަރަކު މުޖާހިދުން ނައްތާލާފައިވާ ކަމަށް އެއްބަސްވެފައެވެ. އަދި އެ ބެޓެލިއަންގެ އިތުރު ސިފައިންނަށް ސީރިއަސް އަނިޔާތަކެއް ލިބިގެން ޣައްޒާއިން ބޭލިކަމަށްވެސް ބުނެފައެވެ.
