ސޯމާލިއާއަށް ހަތިޔާރު ހިފައިގެން މިސްރުގެ މަނަވަރެއް ބަނދަރުކޮށްފިއެވެ. މި ހަތިޔާރު ޝިޕްމަންޓަކީ ސޯމާލިއާގެ ސިފައިންނަށް އެހީތެރިވުމުގެ މަގުސަދުގައި މިސްރުން ސޯމާލިއާއަށް ފޮނުވި ދެވަނަ އަސްކަރީ ޝިޕްމަންޓެވެ.
ޤާހިރާއާއި މޮޤަދިޝޫއިން ވަނީ، އަސްކަރީ އެއްބާރުލުމުގެ އެއްބަސްވުމެއްގައި މިދިޔަ އޮގަސްޓް މަހު ސޮއި ކޮށްފައެވެ. ޓެރަރިޒަމާ ދެކޮޅަށް ސޯމާލީ ސަރުކާރުން ކުރާ މަސައްކަތަށް އެހީތެރިވުމަށް ޤާހިރާއިން ވަނީ ސޯމާލިއާއަށް ވައިގެ މަގުންނާއި ކަނޑުގެ މަގުން އަސްކަރީ ސާމާނު ފޮނުވާފައެވެ.
ދެ ގައުމުން ޑިފެންސް އެގްރީމަންޓުގައި ސޮއިކޮށްފައި ވަނީ ހޯރން އޮފް އެފްރިކާ ނުވަތަ އެފްރިކާގެ މުލީ ސަރަހައްދަށް އަންނަމުންދާ ސަރަހައްދީ އަސްކަރީ ބަދަލުތަކާ ގުޅިގެންނެވެ.
އެފްރިކާގެ މުލީ ސަރަހައްދުގައި ހިމެނޭ ޖިބޫޓީއަކީ ބާބުލްމަންދަބަށް އޮންނަ މުހިންމު ޤައުމެކެވެ. އެ ޤައުމުގައި 5 ގައުމަކުން އަސްކަރީ މަރުކަޒުތައް ހަދާފައި ވެއެވެ.
ސޯމާލިއާ އަކީ އަހުލީ ހަނގުރާމައިގައި 3 ދައުލަތަކަށް ބެހުނު ގައުމެކެވެ. މިހާރު ޕުންޓްލޭންޑް ސޯމާލިއާގެ ބައެއްގެ ގޮތުގައި ހަމަޖެހިފައި ވެއެވެ. ނަމަވެސް ބާޣީ ސޯމާލީލޭންޑަކީ އިތިއޮޕިއާއިން ވާގިވެރިވެގެން ހިންގާ ބާޣީ ސަރުކާރެކެވެ.
ސޯލާމިއާގެ ބަރްބަރާ ބަނދަރަކީ، ރެޑްސީއަށް އޮންނަ ސްޓްރެޓެޖިކް ބަނދަރެކެވެ. އެ ބަނދަރު ކޮންޓްރޯލު ކުރަނީ ސޯމާލީލޭންޑުންނެވެ. އިތިއޯޕިއާއަކީ ރެޑްސީއަށް ނިކުމެވެން އޮންނަ ގައުމެއް ނޫން ކަމުން ސޯމާލީލޭންޑް މެދުވެރިކޮށް ބަރްބަރާގައި އިތިއޯޕިއާގެ ކަނޑުގެ ސިފައިންގެ މަރުކަޒު ހަދަން އެޑިސްއަބާބާއިން ބޭނުންވެއެވެ.
މިސްރާއި އިތިއޮޕީއާ ވެސް އުޅެނީ ފިނި ހަނގުރާމައެއްގައެވެ. ނީލަ ކޯރުގެ ފެން ކޮންޓްރޯލު ކުރުމަށް އިތިއޮޕިއާއިން ރެނައިސަންސް ޑޭމް ހެދުމުން މިސްރުގެ ޤައުމީ ސަލާމަތަށް އިތިއޮޕިއާގެ ފުށުން ނުރައްކާވެފައި ވެއެވެ. އަބްދުލްފައްތާހު ސީސީގެ ވެރިކަމުގައި މިސްރު ވަނީ ސަރަހައްދުގައި އިތިއޯޕިއާއަށް ވުރެން ކުޑަ ބާރަކަށްވެ މުހިންމުކަން ކުޑަވެފައެވެ.
މިސްރަށްވެސް އިތިއޯޕިއާއަށްވެސް އެހީވަނީ އެއް ގައުމަކުންނެވެ. އެމެރިކާއެވެ!
ސޯމާލިއާއާއި އިތިއޯޕިއާއާ ދެމެދު ކުރަމުންދާ ބަހުގެ ޒުވާބާއެކު މިދިޔަ މަހުގެ ފަހު ހަފްތާގައި ސޯމާލިއާއިން ވަނީ އިތިއޯޕިއާގެ ޑިޕްލޮމެޓަކުވެސް އެގައުމުން ބޭރުކޮށްފައެވެ.
ސޯމާލިއާ ފޮރިން މިނިސްޓްރީން އިއުލާން ކުރި ގޮތުގައި ސޯމާލިއާގައި ހުންނަ އިތިއޮޕިއާ އެމްބަސީގެ ސެކަންޑް ކައުންސެލަރު ވަނީ މަސައްކަތާ ނުގުޅޭ އަމަލުތައް ހިންގާފައެވެ. އެހެންވެ، އިތިއޮޕިއާގެ ޑިޕްލޮމެޓް އަލީ މުހައްމަދު އަދްނާން "ޑިޕްލޮމެޓިކް އާދަކާދައާ ޚިލާފަށް އަމަލުކުރުމުން" 72 ގަޑިއިރު ތެރޭގައި ގައުމުން ބޭރުވާން އެންގީ ކަމަށެވެ.
ސޯމާލިއާއަށް އަސްކަރީ ގޮތުން ތުރުކީވިލާތުންވެސް އެހީ ވެއެވެ. ތުރުކީވިލާތުން ސޯމާލިއާގައި ހަތިޔާރު އެސެމްބަލްކޮށް ވިއްކުމަށް ފެކްޓްރީއެއް ހެދުމަށް ނިންމާފައި ވެއެވެ. އަދި ސޯމާލިއާގެ ކަނޑުގެ ސަރަހައްދުން ގޭސްނެގުމަށް ސަރަހައްދު ސާވޭ ކުރުމުގެ މަސައްކަތްވެސް މިދިޔަ ހަފްތާގައި ތުރުކީގެ ސާވޭ ބޯޓަކުން ވަނީ ފަށާފައެވެ.
ސޯމާލިއާގައި ޔޫއޭއީން ވެސް އަސްކަރީ މަރުކަޒެއް ހަދާފައި ވެއެވެ. އެއީ ޔޫއޭއީން ގައުމުން ބޭރުގައި ހެދި ފުރަތަމަ އަސްކަރީ މަރުކަޒެވެ.
ޔޫއޭއީއަކީ، ޔަމަނުގެ ސުއްކަތުރާ ޖަޒީރާ، އިޒްރޭލަށް ދީގެން އިޒްރޭލާއެކު އެ ޖަޒީރާގައި މުވާސަލާތީ ޖާސޫސީ މަރުކަޒެއް ހިންގާ ޤައުމެކެވެ. ސުއްކަތުރާ އޮންނަނީ ސޯމާލިއާ ކުރިމަތީގައެވެ.
ސޯމާލީލޭންޑް ވަކިވެގަތީ 1991ގައެވެ. 1991ން 2006އަށް ސޯމާލިއާގައި ސަރުކާރެއް ނެތި ދިޔައީ އަހުލީ ހަނގުރާމައެއް ކުރަމުންނެވެ.
