ޕާކިސްތާންގެ ލާހޯރުގައި އާދަޔާ ޚިލާފަށް ވައި ނުސާފު ވުމުގެ ސަބަބުން ޕްރައިމަރީ ސްކޫލްތައް ހަފްތާއެއްހާ ދުވަހަށް ބަންދުކުރަން މަޖުބޫރުވެއްޖެ ކަމަށް ސަރުކާރުން ބުނެފި އެވެ. ލާހޯރުގައި އެންމެންވެސް ބޭރުގައި އުޅޭ އިރު މާސްއެޅުމަށްވެސް ސަރުކާރުން ވަނީ މަޖުބުރު ކޮށްފައެވެ.
ސަރުކާރުން އިއުލާން ކޮށްފައިވާ "ގްރީން ލޮކްޑައުން" ގައި ފަންސާސް ޕަސެންޓް މުވައްޒަފުން ގޭގައި ތިބެގެން މަސައްކަތް ކުރަން ޖެހޭ ކަމަށް ސަރުކާރުން ވަނީ އަންގާފައެވެ. އަދި ދުން ފިލްޓަރު ނުކުރެވޭ ގޮތަށް، ބާބަކިއު ހެދުން މަނާކޮށް ތިން ފުރޮޅުލީ ކުރޮޅި ދުއްވުންވެސް މަނާ ކޮށްފައި ވެއެވެ.
ސަރުކާރުން މަސައްކަތް ކުރަނީ، މަސްނޫއީ ގޮތަށް ވާރޭ ވެހޭގޮތް ހަދައިގެން، ވައި ނުސާފުވުން ކޮންޓްރޯލު ކުރެވޭތޯއެވެ.
މިދިޔަ ހަފްތާ ބަންދުގައި ލާހޯރުގެ ވައިގެ ކޮލިޓީ އިންޑެކްސް 1،000 އަށް ވުރެ މައްޗަށް ގޮސްފައިވާއިރު، މިއީ ޕާކިސްތާނުގައި ވައި ނުސާފު ވުމުގެ ރެކޯޑް މިންވަރެއް ކަމަށް މޫސުމާ ބެހޭ އިދާރާއިން ބުނެއެވެ.
ޕަންޖާބު ޕްރޮވިންސްގެ ވެރިރަށް ލާހޯރުގައި މިދިޔަ މަހު ވައި ތަޣައްޔަރުވުން ގޯސްވާން ފެށި ފަހުން ދުން ބޯވެގެން ކުޑަކުދިންނާއި މުސްކުޅިންގެ ދިހަހާސް މީހުން ބަލިވެފައިވާ ކަމަށް ސަރުކާރުން ބުނެއެވެ. ސަރުކާރުން ވަނީ ކަނޑައަޅާފައިވާ ވަކި ސަރަހައްދުތަކެއްގައި އިމާރާތް ކުރުމުގެ މަސައްކަތް ވެސް މަނާކޮށްފައެވެ. އަދި ދުން ބޭރުކުރާ އުޅަނދުފަހަރުގެ ވެރިން ޖޫރިމަނާ ކުރަން ނިންމާފައެވެ.
ލާހޯރުގައި ވައިގެ ތެރޭގައި ކުދިކުދި ޕާޓިކިއުލެޓް މެޓަރގެ ކޮންސެންޓްރޭޝަން 450 އަށް ގާތްވެފައިވާ ކަމަށާއި އެއީ ނުރައްކާތެރި މިންވަރެއް ކަމަށް ބެލެވޭ ކަމަށް ޕަންޖާބުގެ އެންވަޔަރަންމަންޓް ޕްރޮޓެކްޝަން ޑިޕާޓްމަންޓުން ބުނެ އެވެ.
