ކެނެޑާގައި އިންޑިއާގެ ދެކޮޅުވެރިންނަށް ހަމަލަ ދިނުމަށް އިރުޝާދު ދޭ ފަރާތަކީ އިންޑިއާގެ ހޯމް މިނިސްޓަރު އަމިތު ޝާހު ކަމުގައި ކެނެޑާ ސަރުކާރުން ބުނުމުން އިންޑިއާއިން އެކަމަށް ނުރުހުން ފާޅުކޮށްފިއެވެ.
ޚާލިސްތާނީ ޓެރަރިސްޓެއްކަމަށްވާ ހަރުދީޕް ސިންގް ނިޖާރު މަރާލުމުގައި އިންޑިއާގެ ހޯމް މިނިސްޓަރު އަމިތު ޝާހު ބައިވެރިވެވަޑައިގަތް ކަމަށް ބުނާ ތުހުމަތުތަކާ ދެކޮޅަށް އިންޑިއާގެ މިނިސްޓްރީ އޮފް އެކްސްޓާނަލް އެފެއާޒް އިން ރަސްމީކޮށް އިހުތިޖާޖުކޮށްފިއެވެ.
އެ މިނިސްޓްރީން ބުނެފައި ވަނީ، ކެނެޑާގެ މި ތުހުމަތުތަކަކީ "ނުކިއްސަރު، އަސާސެއް ނެތް" ތުހުމަތުތަކެއް ކަމަށެވެ.
ނޫސްވެރިންގެ ބައްދަލުވުމެއްގައި އިންޑިއާގެ ޚާރިޖިއްޔާގެ ތަރުޖަމާނު ރަންދީރު ޖައިސްވާލް ވިދާޅުވީ އިންޑިއާއިން ވަރުގަދަ އިހުތިޖާޖެއް ކެނެޑާގެ ހައި ކޮމިޝަންގެ މަންދޫބަކާ ހަވާލުކޮށްފައިވާނެ ކަމަށެވެ. ކެނެޑާގެ ހައިކޮމިޝަންގެ މަންދޫބާ އިހުތިޖާޖު ހަވާލު ކުރީ މިނިސްޓްރީއަށް ހާޒިރުކޮށްގެންނެވެ. އޭގައި އިންޑިއާ ސަރުކާރުން އެންމެ ހަރުކަށި އިބާރާތުން ކެނެޑާގެ ތުހުމަތުތަކާ ދެކޮޅު ހަދާކަމަށް ބުނެފައިވެއެވެ. އަދި ކެނެޑާގެ ތުހުމަތުތަކަކީ، އަސާސެއް ނެތް ތުހުމަތުތަކެއް ކަމަށްވެސް ބުނެފައި ވެއެވެ.
