އެމެރިކާއިން ހަތިޔާރު ދީގެން، ޒަޔަނިސްޓު ޔަހޫދުން ލައިވް ކޮށް ހިންގަމުން ގެންދާ ގަތުލުއާންމުގައި މިހާތަނަށް 187 ނޫސްވެރިން ޝަހީދުކޮށްފައިވާކަމަށް ފަލަސްޠީނުގެ ނޫސްވެރިންގެ ޖަމުއިއްޔާއިން ބުނެއެވެ. މިއީ ދުނިޔޭގައި އަހަރެއްގެ މައްޗަށް މަރާލާ ނޫސްވެރިންގެ އަދަދަށް ވުރެން ދެގުނައަށް އިތުރު އަދަދެކެވެ.
ޔުނެސްކޯގެ ޑިރެކްޓަރު ޖެނެރަލް އޮޑްރީ އަޒޫލޭ ވިދާޅުވީ 2013 ވަނަ އަހަރުން ފެށިގެން ދުނިޔޭގެ އެކި ކަންކޮޅުތަކުގައި 900 ނޫސްވެރިން މަރާލާފައިވާއިރު، އެވްރެޖްކޮށް އަހަރަކު 82 ނޫސްވެރިން މަރުވެފައިވާ ކަމަށެވެ.
ފަލަސްތީނު ނޫސްވރިންގެ ޖަމުއިއްޔާއިން ގައުމުތަކަށާއި މުއައްސަސާތަކަށް ގޮވާލާފައި ވަނީ "ނޫސްވެރިންގެ ގާތިލުން ޖަވާބުދާރީ ކުރުމަށާއި އެމީހުންނާ ދެކޮޅަށް ދައުވާ ކުރުމަށް ބާރުވެރި ގާނޫނީ ނިޒާމުތައް ގާއިމްކޮށް، އަދަބުން ސަލާމަތް ނުވާނެކަން ޔަގީން ކުރުމަށް އަވަސް ފިޔަވަޅުތަކާއި ނިންމުންތައް ނިންމައި ދިނުމަށެވެ."
ޒަޔަނިސްޓުންގެ އުދުވާނީ ޓެރަރިސްޓް ހަމަލަތަކުގައި އެމެރިކާއިން ދީފައިވާ ހަތިޔާރުން، ފަލަސްޠީނުގެ 43،300 އަށް ވުރެ ގިނަ މީހުން ޝަހީދުކޮށްފައި ވެއެވެ. އޭގެ ތެރޭން ގިނައީ އަންހެނުންނާއި ކުޑަކުދިންނެވެ. އަދި 102،000 އަށް ވުރެ ގިނަ މީހުން ޒަޚަމްކޮށްފައިވެއެވެ.
