އެމެރިކާގެ އިންތިޚާބުގެ އެންމެ ފަހު ވަގުތުގައި ޑިމޮކްރެޓިކް ޕާޓީގެ ކެންޑިޑޭޓް ނައިބު ރައީސް ކަމަލާ ހެރިސް، މިޝިގަން ސްޓޭޓް ޔުނިވާސިޓީގައި ބޭއްވި ޖަލްސާއެއްގައި ވިދާޅުވަނީ "ޣައްޒާގެ ހަނގުރާމަ ނިންމާލަދޭނަން" ކަމަށެވެ. އޭނާގެ މެސެޖު އަމާޒުކުރެއްވީ އަރަބި އެމެރިކާ ދަރިކޮޅު މީހުންނަށް އެންމެ ފަހު ވަގުތު އާދޭސް ކުރެއްވުމުގައެވެ.
އުމުރުން 60 އަހަރުގެ ހެރިސް ދުވަސް ހޭދަކުރެއްވީ މިޝިގަންގައެވެ. ޣައްޒާގައި އެމެރިކާއިން ހަތިޔާރު ދީގެން ޒަޔަނިސްޓުން ކުރާ ހަނގުރާމައިގައި އެމެރިކާއިން ކަންކޮށްފައިވާ ގޮތަށް އެ ސްޓޭޓްގެ ދެ ލައްކަ މީހުން ވަނީ ހެރިސްއާ ދެކޮޅަށް އަޑު އުފުލާފައެވެ.
"ރައީސެއްގެ ހައިސިއްޔަތުން ޣައްޒާގައި ހިނގަމުންދާ ހަނގުރާމަ ނިމުމަކަށް ގެނައުމަށް ކުރެވެން އޮތް ހުރިހާ މަސައްކަތެއް ކުރާނަން،" ހެރިސް ވިދާޅުވިއެވެ. އެމެރިކާގެ ވެރިކަން ހޯދަން އުޑުން ތަރި ބާލަ ނުދޭނީ ކާކު ހެއްޔެވެ؟
ހެރިސް އާދޭސް ކުރައްވާފައި ވަނީ ވޯޓުލާން ބާކީ 36 ގަޑިއިރަށް ވާން ކައިރިވެފައި ވަނިކޮށެވެ.
