މިފަހަރުގެ އަދަބު ދިނުމުގައި ބާރުގަދަ މިސައިލްތައް ބޭނުން ކުރާނެ ކަމަށް އީރާނުން އަރަބިންނަށް އަންގައިފިއެވެ. ކުރިން ބޭނުން ކުރިގޮތާ ޚިލާފަށް ޑްރޯނާއި ބާރު ދެރަކޮށް ގޮއްވާލާ މިސައިލް ބޭނުން ކުރުމެއް މިފަހަރަކު ނޯންނާނެއެވެ.
އެމެރިކާގެ ވޯލްސްޓްރީޓް ޖާނަލް އިން އަރަބި ޑިޕްލޮމެޓުންނާ ޙަވާލާ ދީ ބުނެފައި ވަނީ އީރާނުން އެފަރާތްތަކަށް އަންގާފައިވާ ގޮތުގައި ކުރީގެ ވަޢުދުއްޞާދިޤު 1 އަދި 2 އާ ޚިލާފަށް މިފަހަރު ޙަމަލަތައް ދޭނީ ސީދާ އީރާން ސިފައިންނެވެ. ކުރިން ޙަމަލަތައް ދީފައި ވަނީ އީރާންގެ ރެވަލޫޝަންރީ ގާޑުންނެވެ.
އީރާނުން ޢަރަބި ޤައުމުތަކަށް އެންގި ގޮތުގައި މިފަހަރު ސިފައިން ރައްދު ދެނީ އިޒްރޭލުން އީރާން ސިފައިންގެ 4 މީހަކު ޝަހީދުކޮށް ލުމާ ގުޅިގެންނެވެ.
އަރަބިންނަށް މިހާރު އަންގައި ޔަގީންކޮށްދީފައިވާ ގޮތަށް ބަލާއިރު މިރޭ ނޫނީ މާދަމާ ރޭވެސް އިޒްރޭލަށް އީރާނުން ހަމަލަ ދިނުމަކީ އެކަށީގެންވާ ކަމެކެވެ.
