އާސެނަލްއަށް އިނގިރޭސި ޕްރިމިއާ ލީގު ކާމިޔާބު ކުރުމުގެ ފުރުސަތު އެބައޮތް ކަމަށް އަދި ވެސް ގަބޫލުކުރާ ކަމަށް އެ ކްލަބުގެ ޒުވާން ތަރި ބުކާޔޯ ސާކާ ބުނެފިއެވެ.
ސާކާ މިހެން ބުނެފައި މި ވަނީ ލީގުގައި އާސެނަލްއިން ދަށް ނަތީޖާތަކެއް ނެރެމުން އަންނަ ދަނޑިވަޅެއްގައެވެ. އެ ޓީމު ވަނީ ލީގުގައި އެންމެ ފަހުން ކުޅުނު ތިން މެޗުން ވެސް މޮޅުނުވެވި ތާވަލުގެ 5 ވަނައަށް ވެއްޓިފައެވެ.
ލީގުގެ މުހިއްމު ދަނޑިވަޅެއްގައި އާސެނަލްގެ ފަރާތުން ފެނިގެންގޮސްފައިވާ ދަށް ކުޅުމުގެ ސަބަބުން އެތައް ބަޔަކު އަންނަނީ އެ ޓީމަށް ދެން ލީގު ކާމިޔާބު ކުރުމަކީ ވާނެ ކަމެއް ނޫން ކަމަށް ބުނަމުންނެވެ. ނަމަވެސް ސާކާ ވަނީ, ލީގު ކާމިޔާބު ކުރުމުގެ ފުރުސަތު ގެއްލިފައިވާ ކަމަށް އަދި ގަބޫލުނުކުރާނަން ކަމަށް ބުނެފައެވެ.
"ޓީމުގެ ސްކޮޑުގަ އެހާ ހުނަރުވެރި ކުޅުންތެރިން ތިއްބަ އަހަރެމެންނަށް ލީގު ގެއްލުނީއޭ ނުބުނެވޭނެ. އަދި ކިރިޔާ ނޮވެންބަރު މަހާ ހަމައަށް މި އާދެވުނީ. ކަންކަން މިހެން އޮތް އިރު ނުވާނެ ކަމެއް ނޫން ލީގު ކާމިޔާބު ކުރުމަކީ. އަހަރެން ވެސް އަދި ޓީމުގެ އެއް ވެސް ކުޅުންތެރިޔަކު ގަބޫލުކުރުން ހުއްޓައެއް ނުލައި" އާސެނަލްއަށް ލީގު ކާމިޔާބު ކުރެވޭނެ ކަމަށް ވަކާލާތު ކުރަމުން ސާކާ ބުންޏެވެ.
ސާކާ, އާސެނަލްއަށް ލީގު ކާމިޔާބު ކުރެވޭނެ ކަމަށް ބުނިއިރު, އެ ޓީމު އޮތީ އެއްވަނައިގައި އޮތް ލިވަޕޫލަށްވުރެ 7 ޕޮއިންޓު ދަށުގައެވެ. ލިވަޕޫލާއި މެންޗެސްޓާ ސިޓީގެ ނުފޫޒު ފޫއަޅުވާލައި ލީގު ކާމިޔާބުކުރާނަމަ އާސެނަލްއަށް ކުރަން ޖެހިފައިވަނީ ބުރަ އަދި އުނދަގޫ މަސައްކަތެކެވެ.
