އެމެރިކާގެ މުސްލިމުންނާއި އަރަބިން ޓްރަމްޕަށް ވޯޓުލާފައި ވަނީ އޭނާ ރަނގަޅު ވެގެނެއް ނޫނެވެ. ނަމަވެސް ބައިޑެންގެ ސަރުކާރުން ގަތުލުއާންމު ހިންގުން ހުއްދަ ކުރުމުން އަދަބެއްގެ ގޮތުގައެވެ.
ބައިޑެން އަކީ ފަޚުރުވެރިކަމާއެކު ޒަޔަނިސްޓެއް ކަމަށް ބުނި މީހާއެވެ. އަދި 70ގެ އަހަރުތަކުގައި ބޮލުގެ ފަތްކޮޅު ސަލާމަތުން ހުރި ދުވަސްވަރު އޭނާ ބުނެފައި ވަނީ އިޒްރޭލެއް ނެތް ނަމަ، އެމެރިކާއިން މެދުއިރުމަތީގައި އެމެރިކާގެ މަސްލަހަތު ކުރިއަށް ނެރުމަށް އިޒްރޭލެއް އިންދީސް ކަމަށެވެ.
ބައިޑެން އަކީ ޔަހޫދީ ލޮބީކަމަށްވާ އައިޕެކްއިން އުމުރު ދުވަހު ފައިދާއާއި ފައިސާ ހޯދަމުން ދިޔަ ސިޔާސީ ލީޑަރެކެވެ.
ޓްރަމްޕްގެ ކާމިޔާބީއާއެކު އެމެރިކާގެ މުސްލިމުންގެ ލީޑަރު ޢުމަރު ސުލައިމާނު ވިދާޅުވަނީ "ގަތުލުއާންމަކީ ބޮޑު އަގެއް ދައްކަން ޖެހޭ ޖަރީމާއެއް" ކަމަށެވެ. އަދި ކިބުރުވެރިކަމާއެކު އެކަމަށް ބޮޑު ބަސްބުނި މީހުންނަށް އެމީހުންގެ ވެއްޓުން ފެނިގެން ހިނގައްޖެ ކަމުގައި އޭނާ ވިދާޅުވިއެވެ. އަދި "ރަތުން ވިއަސް ނުލުން ވިއަސް ކޮންމެ ކުލައެއްގެ ސާލެއް އޮޅައިގެން ހުރިނަމަވެސް (މުސްލިމުން) އެފަރާތަކާ ކުރިމަތިލާނެ" ކަމުގައި އޭނާ ވިދާޅުވިއެވެ.
