ޓްރަމްޕް ކާމިޔާބު ކުރުމުން ތާލިބާން ސަރުކާރުން އުފާ ފާޅުކޮށްފިއެވެ. ތާލިބާނަށް ކާބުލްގެ ވެރިކަން ލިބުނީ ޓްރަމްޕްގެ ވެރިކަމުގައި ކުއްލި ގޮތަކަށް އެމެރިކާ ސިފައިން އަފްޣާނިސްތާނުން ބޭލުމުންނެވެ. ޤަތަރުގައި ޓްރަމްޕް އެއިރު ތާލިބާން ގާތުން އެދިވަޑައިގަތީ އެމެރިކާ ސިފައިންގެ މީހަކަށް ގޯނާއެއް ނުކުރާށެވެ. ތާލިބާން އެ ވައުދު ދެމެހެއްޓިއެވެ.
ތާލިބާންގެ އިންފޮމޭޝަން މިނިސްޓްރީގެ އީމާނުﷲ ސަމަންގާނީ ވިދާޅުވަނީ އެމެރިކާގެ އިންތިޚާބުން އެނގި ސާފުވެގެން ދިޔައީ އަންހެނަކަށް އެމެރިކާގެ ވެރިކަން ދޭން އެމެރިކާ މީޙުން ތައްޔާރަށް ނެތް ކަމެވެ. އެކަމަށް އޭނާ ވަނީ އުފާ ފާޅުކުރައްވާފައެވެ.
ތާލިބާންގެ ފޮރިން މިނިސްޓްރީގެ ތަރުޖުމާން ޢަބްދުލް ޤާދިރު ބަލަޚީ ވިދާޅުވީ ތާލިބާނުން އުންމީދު ކުރަނީ ޓްރަމްޕް ވެރިކަމަށް ވަޑައިގަތުމުން ތާލިބާނާއި އެމެރިކާގެ އައު ބާބެއް ފެށޭނެ ކަމަށެވެ. އަދި ތާލިބާން ސަރުކާރު ބަލައިގަނެ ގުޅުން ރަނގަޅު ވާނެ ކަމަށެވެ.
