ޖެކް ސްމިތު މަގާމުން ދުރުކުން:
ކެމްޕޭންގައި ޓްރަމްޕް ވިދާޅުވެފައި ވަނީ، އޭނައާ ދެކޮޅަށް ދައުވާ ކުރާ ޕްރޮސެކިއުޓަރު ޖެކް ސްމިތު ފުރަތަމަ ދުވަހު މަގާމުން ދުރު ކުރައްވާނެ ކަމަށެވެ. ޓްރަމްޕް ވިދާޅުވީ، ވެރިކަމުގެ ފުރަތަމަ ދެ ސިކުންތުގެ ތެރޭގައި އޭނާ އެކަން ކުރައްވާނެ ކަމަށެވެ.
ރަޝިޔާ ޔުކްރެއިން ސުލްހަ ކުރުން:
ޓްރަމްޕް ވިދާޅުވެފައި ވަނީ އޭނާގެ ޚާރިޖީ ސިޔާސަތަކީ އެމެރިކާއަށް އިސްކަން ދޭ ސިޔާސަތު ކަމަށެވެ. އެހެންވެ، ފުރަތަމަ ދުވަހުވެސް ރަޝިޔާއާއި ޔުކްރެއިން މަޝްވަރާގެ މޭޒަށް ގެންނަވާނެ ކަމުގައެވެ. އަދި މެދުއިރުމަތީގެ ހަމަޖެހުން ގާއިމް ކުރުމަށް، އީރާނާ ދެކޮޅަށް ހަރުކަށި ފިޔަވަޅުތަކެއް އަޅުއްވާނެ ކަމަށެވެ.
މޫސުމާ ބެހޭ ސިޔާސަތު:
ހަކަތައާއި މޫސުމާ ބެހޭ މައްސަލަތަކުގައި ޓްރަމްޕް ވިދާޅުވެފައި ވަނީ ނިއުކްލިއަރ ހަކަތަ އުފެއްދުމަށް ބޭނުންވާ ފަރާތްތަކަށް އެކަމުގެ ހުއްދަ ދެއްވާނެ ކަމަށެވެ. އަދި ތެޔޮ ހޯދުމަށްޓަކައި އާނުގަނޑު ފަޅައިގެން ތެޔޮ ނެގުމަށް ހުއްދަ ދެއްވާނެ ކަމަށެވެ.
ހިޖުރަވެރިން ބޭރުކޮށްލުން:
އެމެރިކާއަށް ހިޖުރަ ކޮށްފައިވާ މީހުންނާ ބެހޭ ގޮތުން އޭނާ ވިދާޅުވީ ގަވާއިދާ ޚިލާފަށް އެމެރިކާ އަށް ވަދެފައިޥާ މީހުން ބޭރުކުރުމަށް ފުރަތަމަ ދުވަހުވެސް އޭނާ މަސައްކަތް ފަށްތަވާނެ ކަމަށެވެ. އަދި އެމެރިކާއަށް ވަގަށް އެތެރެ ނުވެވޭ ގޮތް ހެދުމާއި އެމެރިކާގެ ބޯޑަރު ކޮންޓްރޯލު ކުރުމަށް ފުރަތަމަ ދުވަހުވެސް މަސައްކަތް ކުރައްވާނެ ކަމަށެވެ.
އަފޫއާންމު ދިނުން:
މިދިޔަ ރިއާސީ އިންތިޚާބާ ގުޅިގެން ހަމަނުޖެހުން އުފައްދައިގެން ޖަލަށް ލާފައިވާ މީހުންނަށް އަފޫ އާންމެއް ދެއްވާނެ ކަމަށްވެސް ޓްރަމްޕް ވަނީ ވިދާޅުވެފައެވެ. އޭނާ ވިދާޅުވީ އެއީ ސިޔާސީ ގޮތުން ޖަލަށް ލާފައިޥާ މީހުން ކަމަށެވެ.
