ޖަރުމަނުގެ ޗާންސެލާ އޮލާފް ޝުލްޒް ވަނީ ފިނޭންސް މިނިސްޓަރު ކްރިސްޓިއަން ލިންޑްނަރ މަގާމުން ވަކިކުރެއްވިކަން އިއުލާން ކުރައްވާފައވެ. އަދި ޗާންސެލަރ ޝުލްޒް ވަނީ، ސަރުކާރަށް އިތުބާރު އޮތްތޯ ބެލުމަށް ޖަނަވަރީ މެދުތެރޭގައި ވޯޓެއް ނެގުމަށް ވެސް ހުށަހަޅުއްވާފައެވެ. ޖަރުމަންގެ އިގްތިސާދީ މައްސަލަތަކާ ގުޅިގެން ޝުލްޒްގެ "ސޯޝަލް ޑިމޮކްރެޓިކް" ޕާޓީއާއި "ގްރީން ޕާޓީ" އަދި "ފްރީ ޑިމޮކްރެޓިކް" ޕާޓީތަކުން ހަދާފައިވާ ކޯލިޝަން ރޫޅިދާނެ ހެން ހީވެއެވެ.
ނޫސްވެރިންގެ ބައްދަލުވުމެއްގައި ޝުލްޒް ވިދާޅުވީ، "އަޅުގަނޑުމެންގެ ޕާޓީން ހުށަހެޅި އެއްވެސް ހުށަހެޅުމެއް ތަންފީޒު ކުރައްވަން ފިނޭންސް މިނިސްޓަރު ބޭނުންފުޅު ނުވުމުން ވަކިކޮށްލީ" ކަމަށެވެ. ފިނޭންސް މިނިސްޓަރަކީ، ފްރީ ޑިމޮރެޓިކް ޕާޓީ މެމްބަރެކެވެ. ޝުލްޒް ވިދާޅުވީ ސަރުކާރަށް ޖެހޭނީ ރައްޔިތުން ބޭނުންވާ ގޮތަށް ލުއިތައް ދޭށެވެ.
އޭނާ އިތުރަށް ވިދާޅުވީ "ސަރުކާރަކީ މިވަގުތު ވަޒީރު ކްރިސްޓިއަން ލިންޑްނާގެ ފޯކަސްއެއް ނޫން. އޭނާ ފޯކަސް ކުރައްވަނީ އޭނާގެ ސަޕޯޓު ދެމެހެއްޓެވުމަށް" ކަމަށާއި އަދި އެ ގޮތަށް މަސައްކަތް ނުކުރެވޭނެ ކަމުގައި ވިދާޅުވިއެވެ.
ޔޫރަޕްގެ އެންމެ ބޮޑު އިގްތިސާދު ކަމަށްވާ ޖަރުމަނުން އެމެރިކާގެ އިންތިޚާބުގައި ޑޮނަލްޑް ޓްރަމްޕް ކާމިޔާބު ކުރެއްވުމަށް ފަހު ޖަރުމަނަކީ އެމެރިކާއަށް އިތުބާރު ކުރެވިދާނެ ބައިވެރިއެއްކަމަށް ދައްކަން ޖެހޭނެ ކަމަށް ވެސް އޭނާ ވިދާޅުވިއެވެ.
ޖަނަވަރީ 15 ގައި އިތުބާރު ގެ ވޯޓެއް ނެގުމަށްފަހު، ކަން ދިމާކުރާ ގޮތަކުން ޖަރުމަންގައި މާޗް މަހު އަވަސް އިންތިޚާބެއް ބޭއްވުމަކީ އެކަށީގެންވާ ކަމެކެވެ.
މާލީ ވަޒީރު ވިދާޅުވީ ޖަރުމަނަށް މި ވަހުތު ބޭނުންވަނީ އައު އިގްތިސާދީ ވިސްނުމެކެވެ. ޝުލްޒް ހުންނެވީ އެފަދަ ބަދަލެއް ގެންނެވުމުގެ ވިސްނުމެއްގައި ނޫން ކަމަށް އޭނާ ވިދާޅުވިއެވެ.
