ޕާކިސްތާންގައި މި އަހަރު ޕޯލިއޯ ވައިރަސްގެ 46 ވަނަ ކޭސް ބަލޫޗިސްތާނުގެ ކިއްލާ ސައިފުއްލާ ޑިސްޓްރިކްޓުން ފެނިފައިވާ ކަމަށް މަސްއޫލުވެރިން އިއުލާން ކޮށްފިއެވެ.
އިސްލާމްއާބާދުގެ ރީޖަނަލް ރެފަރެންސް ލެބޯޓްރީ ފޯ ޕޯލިއޯ އެރެޑިކޭޝަންގެ އޮފިޝަލަކު ޑޯން ނޫހާ ވާހަކަ ދައްކަވަމުން ވިދާޅުވީ، ވައިލްޑް ޕޯލިއޯ ވައިރަސް ޓައިޕް 1 (ޑަބްލިއުޕީވީ1) ގެ ކޭސްއަކީ ފިރިހެން ކުއްޖެއް ކަމަށެވެ. މިއީ އެ ސަރަހައްދުން ޕޯލިއޯ ވައިރަސް ޖެހުނު ދެވަނަ ކުއްޖާއެވެ.
މިހާތަނަށް ބަލޫޗިސްތާނުން 23 މީހުންނާއި ސިންދުން 12 މީހުންނާއި ޚައިބަރު ޕަޚުތޫންޚުޥާއިން ނުވަ މީހަކު އަދި ޕަންޖާބާއި އިސްލާމްއާބާދުން ކޮންމެ ތަނަކުން އެއް ކޭސް ފެނިފައިވެއެވެ.
މަސްއޫލުވެރިން ބުނިގޮތުގައި ކިއްލާ ސައިފުއްލާއިން މި ކޭސް ފެނިފައިވަނީ އެ ހިސާބުގެ ނަރުދަމާތަކުގެ ފެން ތަހުލީލު ކުރުމުން ޕޯލިއޯ ވައިރަސް އުޅޭކަމަށް ފާހަގަ ވެގެން އިތުރަށް ޓެސްޓްތައް ކުރަމުން ދިއުމުގެ ތެރޭގައެވެ. އަދި ނަރުދަމާއިން ފެނުނު ސާމްޕަލްތަކުން ވައިރަސް ފެނުމާއި މީހުންގެ ގައިން ވައިރަސް ފެނުމުން ޔަގީން ވަނީ، ފުޅާދާއިރާއެއްގައި ޕޯލިއޯގެ ވައިރަސް އަށަގެންފައިވާ ކަމެވެ.
މިދިޔަ ހަފްތާގައި ވައިރަސް ފެނިފައި ވަނީ ބަލޫޗިސްތާނާއި ޕަންޖާބުންނެވެ.
ނޮވެމްބަރު މަހުގެ މިހާތަނަށް ބެލޫޗިސްތާނާއި ޚައިބަރު ޕަޚްތުންޚްވާއިން ޕޯލިއޯ ވައިރަސް ޖެހިފައިވާ ތިން މީހަކު ވަނީ ފެނިފައެވެ.
ޕާކިސްތާންގައި ސަގާފަތާއި ދީނީ ސަބަބުތަކަށްޓަކައި މީހުން ޕޯލިސްއޯ ވެކްސިން ކުދިންނަށް ދޭކަށް ބޭނުމެއް ނުވެއެވެ. އަދި އެމރިކާއިން ހިންގި ޖާސޫސީ އަމަލުތަކާ ހެދިވެސް މީހުން ވެކްސިން ދޭން އަންނަ މީހުންނަށް ޝައްކު ކޮށްގެން ގާތްވާން ބޭނުމެއް ނުވެއެވެ.
