މިސްރުގެ ސޯޝަލް ސޮލިޑަރިޓީ މިނިސްޓްރީން އާޓިފިޝަލް އިންޓެލިޖެންސް (މަބް) އިން މުއާމަލާތު ކުރާ ތަރުޖަމާނެއް ތައާރަފްކޮށްފަ އެވެ.
އެ މިނިސްޓްރީން ބުނި ގޮތުގައި މިމަސްނޫޢީ ސިކުނޑިއަށް، އެމިނިސްޓްރީގެ މީސްމީޑިއާ ކޮންޓެންޓުތައް އުފައްދައި، ޑޮކިއުމެންޓްތައް ތައްޔރުކޮށްދީ، ސުއާލުތަކަށް ޖަވާބު ދިނުމުގެ ގާބިލްކަން ލިބިގެންވާނެ ކަމަށެވެ.
މި މަސްނޫޢީ ސިކުނޑިން 50 ބަހަކުން ވާހަކަ ދައްކަން ތަމްރީނުކޮށްފައި ވެއެވެ. އަދި 24 ގަޑިއިރު މަސައްކަތް ކުރުމަށްވެސް ކުޅަދާނަ ވާނެއެވެ.
އެ މިނިސްޓްރީގެ ސްޓްރެޓެޖިކް ކޮމިއުނިކޭޝަން އެންޑް އިންފޮމޭޝަން އާ ބެހޭ ސްޓޭޓް މިނިސްޓަރ މުހައްމަދު އަލްއަޤާބީ މީޑިއާއަށް ވާހަކަ ދައްކަވަމުން ވިދާޅުވީ މި މަބް ތަމްރީނު ކޮށްފައި ވަނީ އާޓިފިޝަލް އިންޓެލިޖެންސް ޖާނަލިޒަމް ފައުންޑޭޝަންގެ ސީއީއޯ އަދި މަބްގެ ތަޖުރިބާކާރު ޑރ. މުހައްމަދު އަބްދުއްތާހިރުއާއި ޔުނިސެފްގެ އެހީތެރިކަމާއެކުގައި ކަމަށެވެ. އަދި ތަފާތު ބަސްބަހުން ވާހަކަ ދެއްކުމަށް ތަމްރީނު ދިނުމަށް 1200 މީހުންގެ ތެރެއިން ހޮވާލެވުނު 30 ފަރާތެއް ބޭނުންކޮށްގެން ތަމްރީނު ކޮށްފައިވާނެ ކަމަށްވެސް ބުނެފައި ވެއެވެ.
