ޗައިނާއަށް ޖާސޫސްކޮށްދޭން އުޅުނު ކަމުގެ ތުހުމަތުގައި ޖަރުމަނުވިލާތުގައި އެމެރިކާ ސިފައިންގެ މީހަކު ހައްޔަރުކޮށްފިއެވެ. ފްރެންކްފަރޓްގައި ހައްޔަރުކުރި މީހާއަކީ ސިފައިންގެ ތެރޭގައި އުޅުނު މީހެއް ކަމަށާއި އޭނާއަކީ، "ޗައިނާގެ ސިއްރު އޭޖެންޓެއް"ގެ ގޮތުގައި ހަރަކާތްތެރި ވެފައިވާ މީހެއްކަމުގައި ބެލެވޭ ކަމަށް ޖަރުމަން ސަރުކާރުން ނެރުނު ބަޔާނެއްގައި ބުނެއެވެ. އޭނާގެ އެޕާޓްމަންޓް ބަލައި ސަލާމަތީ ބާރުތަކުން ފާސްކޮށްފައިވާ ކަމަށާއި ހައްސާސް މައުމޫލާތު ޗައިނާއަށް ފާދާލާފައިވާކަން އެނގޭކަމަށް ވެސް ބުނެފައި ވެއެވެ.
ޖަރުމަން ސަރުކާރުން މިމީހާގެ ނަމަކަށް ބުނެފައި ވަނީ މާޓިން ޑީ އެވެ.
އެމެރިކާ ސިފައިންނާ ބެހޭ ނާޒުކު މައުލޫމާތު އޭނާ ހޯދާފައި ވަނީ ސިފައިންގެ ތެރޭގައި އޭނާ އުޅުމުގެ ތެރޭނެވެ. ޖަރުމަނު ގައި ޖާސޫސް ކުރުމުގެ މަސައްކަތް އިތުރު ވެފައިވާތީ އޮކްޓޯބަރު މަހުގެ ކުރީކޮޅުން ފެށިގެން ސްޓްރެޓެޖިކް އިންފްރާސްޓްރަކްޗާގެ ސަލާމަތީ ކަންކަން ވަރުގަދަކޮށް ސަވައިލެންސް ހަރުދަނާ ކޮށްފައި ވެއެވެ.
އޭޕްރީލް މަހުވެސް ޔޫރަޕްގެ ހަރުކަށި ކަނާތުފިޔައިގެ އެމްޕީއެއްގެ އެހީތެރިއަކު ވަނީ ބްރަސެލްސްގައި ހައްޔަރުކޮށްފަ އެވެ. އޭނާއަކީ ޖަރުމަނުގައި ޗައިނާގެ އިދިކޮޅު ފަރާތްތަކަށް ޖާސޫސްކޮށް، ޔޫރަޕިއަން ޕާލަމެންޓާ ބެހޭ މައުލޫމާތު ޗައިނާގެ ޖާސޫސީ ޚިދުމަތަކާ ހިއްސާކުރާ މީހެއް ކަމަށް ޝައްކުކޮށްފައިވެއެވެ.
