އިނގިރޭސިވިލާތުގެ ޚާރިޖީ ވަޒީރު ޑޭވިޑް ލެމީއަކީ ޒަމާނުއްސުރެން ޓްރަމްޕްގެ ހަތުރެކެވެ. ކުރިން ޓްރަމްޕް ސިފަކުރައްވަމުން ލެމީ ވިދާޅުވީ އެއީ "އަންހެނުން ދެކެ ނަފްރަތުކުރާ މީހެއް" އަދި އެއީ "ނިއޯ ނާޒީންނަށް ހަމްދަރުދީ ވާމީހެއް" އަދި "ބިދޭސީންނަށް ބޮޑު ނުރައްކަލެއް" ކަމަށެވެ. އަދި ޓްރަމްޕް ލަންޑަނަށް ވަޑައިގެންފިނަމަ އޭނާއާ ދެކޮޅަށް މުޒާހަރާއަށް ނިކުންނަވާނެ ކަމަށްވެސް ލެމީ ކުރިން ވިދާޅުވިއެވެ.
މިހާރު ޓްރަމްޕް އެނބުރި ވައިޓްހައުސްއަށް ވެންނެވުމަށް ތައްޔރުވާއިރު، އިނގިރޭސި ބޮޑުވަޒީރު ކޭއާ ސްޓާމަރަށް ލެމީގެ ވާހަކަފުޅުތަކުން "ޑިޕްލޮމެޓިކް މައްސަލައެއް" ކުރިމަތިވެދާނެ ކަމެއް ކަމަށް އިނގިރޭސި ޓެލެގްރާފް ނޫހުން ބުނެ އެވެ.
ފާއިތުވި މަސްތަކުގައި ލެމީ ވަނީ ޓްރަމްޕާ ގުޅުން ރަނގަޅު ކުރެއްވުމަށްވެސް މަސައްކަތްތަކެއް ކުރައްވާފައެވެ.
ލެމީއަކީ ނިއުޔޯކުގައި ދިރިއުޅޭ އާއިލީ މީހުންނަށް ގިނަގިނަ އިން ޒިޔާރަތް ކުރައްވާ ބޭފުޅެކެވެ. ޝެޑޯ ފޮރިން ސެކްރެޓަރީގެ މަގާމުގައި 7 ފަހަރު އަދި މިދިޔަ ޖުލައި މަހުގެ އިނގިރޭސި އިންތިޚާބަށް ފަހު ދެ ފަހަރު ޒިޔާރަތް ކުރައްވާފައި ވެއެވެ.
އިންތިޚާބުގެ ތެރޭގައި ލެމީއާއި އިނގިރޭސި ބޮޑުވަޒީރު ކޭއާ ސްޓާމަރ ވަނީ ޓްރަމްޕް ޓަވަރުގައި އޭރުގެ ކެންޑިޑޭޓު ޓްރަމްޕާއެކު ޕްރައިވެޓް ޑިނަރއެއްގައިވެސް ބައިވެރިވެ ވަޑައިގެންފައެވެ. ދެ ގަޑިއިރާއި ބައި ވަންދެން 3 ބޭފުޅުން ވާހަކަތައް ދެއްކެވި ކަމަށާއި ޓްރަމްޕްގެ މަންމަ ނިސްބަތްވާ ސްކޮންޓްލެންޑަށް އޮތް އޭނާގެ ލޯބީގެ ވާހަކަތައް ވެސް ވިދާޅުވެ ދެއްވިކަމަށް މީޑިއާ ރިޕޯޓުތައް ބުނެއެވެ.
