ޕާކިސްތާނުގައި ވާނުވާ ޖެހުން އާންމުވެފައި އޮތުމުގެ ސަބަބުން ޖަލުތައް ވަރަށް ބޮޑަށް ތޮއްޖެހި، ގައިދީންނަށް ކޮންމެހެން ބޭނުންވާ ސިއްހީ ފަރުވާ ނުދެވި ދާކަމަށް، ހިއުމަން ރައިޓްސް ވޮޗްއިން ނެރުނު ރިޕޯޓެއްގައި ބުނެފިއެވެ.
"އަ ނައިޓްމެއާ ފޯ އެވަރިވަން: ދަ ހެލްތު ކެއާ ކްރައިސިސް އިން ޕާކިސްތާން ޕްރިޒަންސް"އަކީ ހިއުމަން ރައިޓްސް ވޮޗްއިން ނެރެފައިވާ 55 ޞަފްޙާގެ ރިޕޯޓެވެ.
ޕާކިސްތާންގެ ޖަލުތަކަކީ އޭގެ ދެގުނަ އިތުރަށް ގައިދީން ލައިގެން ހިންގާތަންތަން ކަމަށް ބުނެފައި ވެއެވެ. އެގައުމުގެ ޖަލުތަކުގެ ނިޒާމުގައި ވާނުވާގައި ތިބި 88،000 އަށް ވުރެ ގިނަ ގައިދީންނަށް ކުރިމަތިވެފައިވާ ބިރުވެރި ހާލަތުގެ ތަފްސީލު އެ ރިޕޯޓުގައި ކިޔައިދީފައި ވެއެވެ.
ޖަލު ހެދިއިރު، ތިން މީހުންނަށް ފަރުމާކޮށްފައިވާ ގޮޅިތަކުގައި މިހާރު 15 މީހުންނަށް ޖާގަ ލިބޭ ކަމަށް ބުނެފައި ވެއެވެ. އަދި ގައިދީން ގިނަ ވުމުން، ގައިދީންނަށް ސާފުތާހިރުކަން ކުޑަ މުޑުދާރު ހާލަތެއް ކުރިމަތިވެފައިވާ ކަމަށާއި އެކަށީގެންވާ ކާނާ ނުލިބުމާއި، ބޭސްފަރުވާގެ ޚިދުމަތް ނުލިބުމުގެ މައްސަލަތައް ކުރިމަތިވެފައިވާ ކަން ފާހަގަ ކޮށްފައި ވެއެވެ.
އެންމެ ބޮޑު މައްސަލައެއް ކަމަށް ހިއުމަން ރައިޓްސް ވޮޗުން ފާހަގަ ކޮށްފައި ވަނީ، ތޮއްޖެހުމުގެ ސަބަބުން ސިއްހީ ޚިދުމަތަށް ހުރަސް އެޅިފައިވާ ކަމެވެ. އޭގެ އިތުރުން ޤައުމީ ކާރިސާތައް ކަމަށްވާ ފަހަކަށް އައިސް ދިމާވި ފެންބޮޑުވުމުގެ މައްސަލައައާއި ކޯވިޑް-19 ފަދަ ހާލަތްތަކުން ގައިދީންގެ ހާލަތު އިތުރަށް ގޯސްވެ ގައިދީންނަށް ނުރައްކާވެފައިވާ ކަމަށް ބުނެފައި ވެއެވެ.
މި ރިޕޯޓުގައި އަލިއަޅުވާލާފައިވަނީ ނިޒާމީ އިހުމާލުން ކަންކަން ގޯސްވެފައިވާ ކަމަށާއި، އަންހެނުންނާއި ކުޑަކުދިންގެ ގިނަ ގައިދީންނަށް ސިއްހީ އަސާސީ ހިދުމަތްތައް ނުލިބޭ ކަމަށެވެ.
އަންހެން ގައިދީންނަށް އަނިޔާ ލިބުމާއި، މައްސަރު ކަންތައްތަކުގައި ސާފުތާހިރުކަން އެކަށީގެންވާ ވަރަށް ނުލިބުމާއި، ގިނަ ފަހަރަށް އާއިލާތަކުން އެމީހުންނާ އަޅާނުލައި ދޫކޮށްލާތީ، ޖިންސީ އަނިޔާގެ ފުރުސަތު އިތުރުވާ ކަންވެސް ފާހަގަ ކޮށްފައި ވެއެވެ.
ޖަލުތަކުގެ ސިއްހީ ފަރުވާއަށް ފައިސާގެ ދަތިކަން ބޮޑުވެފައި ވަނީ ދައުލަތުގެ ބަޖެޓުން އެކަމަށް އެކަށީގެންވާ ހޭދައެއް ކަނޑައަޅާފައި ނެތުމުން ކަމަށްވެސް ބުނެފައި ވއެވެ.
މިމައްސަލަތައް ހައްލު ކުރުމަށް ހިއުމަން ރައިޓްސް ވޮޗްއިން ވަނީ، ކަފާލާތުގެ ގާނޫނުތައް އިސްލާހުކުރުމަށާއި، ވާނުވާ ޖެހުން ކޮންޓްރޯލު ކުރުމަށާއި ބައިނަލްއަގްވާމީ މިންގަނޑުތަކާ އެއްގޮތަށް ސިއްހީ ފަރުވާ ލިބޭނެ ގޮތް ކަށަވަރުކުރުމަށް ހުށަހެޅުންތައް ހުށަހަޅާފައެވެ.
ނިއުމަން ރައިޓްސް ވޮޗްގެ ރިޕޯޓުގައި ޕާކިސްތާން ސަރުކާރަށް އިލްތިމާސްކޮށްފައި ވަނީ ނެލްސަން މަންޑޭލާ ގަވާއިދުގައި ބަޔާންކޮށްފައިވާ ގޮތަށް ތޮއްޖެހުން މަދުކޮށް ދިރިއުޅުމުގެ ހާލަތު ރަނގަޅުކޮށް ގައިދީންގެ ހައްގުތައް ހިފެހެއްޓުމަށް އިސްލާހުތައް ތައާރަފްކުރުމަށެވެ.
