އެމެރިކާގެ ރައީސް ކަމަށް ޑޮނަލްޑް ޓްރަމްޕް އެނބުރި އައުމަކީ މިހާރު ބަންގްލަދޭޝްގެ ވަގުތީ ޗީފް އެޑްވައިޒަރުގެ މަގާމު އަދާކުރައްވާ ބަންގްލަދޭޝްގެ ނޮބެލް އެވޯޑް ލިބިފައިވާ ޑރ. މުހައްމަދު ޔޫނުސްއަށް ބައިޑެންގެ ވެރިކަމުގައި ލިބުނު ތާއީދު ފަނޑުވެގެންދާނެ ކަމެއް ކަމަށް ލަފާ ކުރެވެއެވެ.
ބައިޑެންގެ ސަރުކާރުން ވަނީ ޔޫނުސްއަށް ބޮޑު ތާއީދެއް ދީފައެވެ. އަދި ޝެއިހް ހަސީނާގެ ސަރުކާރު ވައްޓާލަދީ، އޭނާ ވެރިކަމަށް އައުމަށް އެހީތެރިވެދީފައި ވެއެވެ.
އިންސާނީ ހައްގުތަކާ ހިލާފު އަމަލުތަކެއް ހިންގުމާ ގުޅިގެން އެމެރިކާއިން ހަސީނާގެ ރެޕިޑް އެކްޝަން ބެޓޭލިއަން (އާރުއޭބީ) އަށް ދަތިކުރުމުގެ ފިޔަވަޅުތަކެއް އަޅައި، ބަންގްލަދޭޝްގެ އޮފިޝަލުންނަށް ވިސާ ދިނުން މަނާކޮށްފައި ވަނިކޮށް ހަސީނާގެ ސަރުކާރު ވެއްޓުނެވެ.
ޔޫނުސް އަކީ، ޖޯ ބައިޑަން އާއި ބިލް ކްލިންޓަން ފަދަ ޑިމޮކްރެޓިކް ލީޑަރުންގެ ގާތް އެކުވެރިއެކެވެ. އަދި ޔޫނުސްއަކީ އެފަރާތްތަކުގެ ތާއީދުގެ ފައިދާ ލިބުނު ފަރާތެކެވެ.
ޓްރަމްޕްގެ ދެވަނަ ރިޔާސީ ދައުރުގައި އެމެރިކާއާއި ބަންގްލަދޭޝްގެ ގުޅުމަށް ވަރަށް ބޮޑަށް ބަދަލު އަތުވެދާނެ އެވެ. ޓްރަމްޕްގެ "އެމެރިކާ ފުރަތަމަ" އުސޫލުން ބަންގްލަދޭޝްގައި ޑިމޮކްރަސީ ކުރިއެރުވުމަށް އިސްކަން ނުދިނުމަކީ ގާތްކަމެކެވެ.
އިގްތިސާދީ އަދި ސްޓްރެޓެޖިކް މަސްލަހަތުތަކަށް ވަރުގަދަ ސަމާލުކަމެއް ދީ، ހާއްސަކޮށް އިންޑިއާއަށް އިސްކަމެއް ދޭ ސިޔަސަތެއް ޓްރަމްޕް ގެންގުޅުއްވަފާނެއެވެ. އެއީ، އޭނާއާއި މޮދިއާ ދެމެދު ކުރިންވެސް އަދި މިހާރުވެސް އޮންނަ ޖާޒުބީ ގުޅުމުން ވެދާނެ ކަމަށް ލަފާ ކުރެވޭ ކަމެކެވެ.
ޓްރަމްޕްގެ ވެރިކަމުގައި އެނާއަށް މުހިންމުވާނީ، ދާޚިލީ މައްސަލަތަކަށް ފޯކަސް ކުރެއްވުމެވެ.
ފާޑުކިޔާ ފަރާތްތަކުން ބުނާ ގޮތުގައި ޔޫނުސްއަށް ހުރިހައި ސިޔާސީ ފަރާތްތައް ބައިވެރިވާ ސިޔާސީ ނިޒާމެއް ގާއިމެއް ނުކުރެއްވުނެވެ. އަދި ކުރެއްވޭނެ ހެނެއްވެސް ހިއެއް ނުވެއެވެ.
އެހެންވެ، އިންސާފުވެރި އިންތިޚާބުތައް އަވަސް ގޮތަކަށް ބެއްވުމަށާއި ވަކި ފަރާތަކަށް ނުޖެހޭ ކެއާޓޭކަރ ސަރުކާރަކަށް ގޮވާލާ ގޮވާލުންތައް މިހާރުވެސް އިތުރުވެއްޖެ އެވެ.
