ނަސްލު ނައްތާލަމުން، ޒަޔަނިސްޓު ޔަހޫދުން ފަލަސްޠީނުގެ ބިމުގައި ހަނގުރާމައިގެ ޖަރީމާތައް ހިންގާ ކަމަށް ބުނެ ދެކުނު އެފްރިކާ އިން ކޮށްފައިވާ، ދައުވާގައި އަޔަރލެންޑުން ބައިވެރިވެއްޖެ އެވެ. އަދި ފުރިހަމައަށް ޑިޕްލޮމެޓިކް އިމްތިޔޒު ލިބިފައިވާ ފަލަސްޠީނުގެ ސަފީރަކުވެސް ގަބޫލުކޮށްފި ކަމަށް އަޔަރލެންޑުން މިއަދު އިއުލާން ކޮށްފިއެވެ.
އަޔަރލެންޑުން ކުރިން ބުނެފައި ވަނީ ޒަޔަނިސްޓު އިޒްރޭލުން ފަލަސްޠީނުގައި ހިންގާ އަމަލުތަކަކީ ނަސްލު ނައްތާލުމުގެ އަމަލުތަކެއް ކަމަށް ދެކުނު އެފްރިކާއަށް ސާބިތު ކޮށްދެވިއްޖެނަމަ އެ ދައުވާގައި އަޔަރލެންޑުން ބައިވެރިވާނެ ކަމަށެވެ.
އަޔަރލެންޑްގެ ޕާލަމެންޓްގައި ވާހަކަ ދައްކަވަމުން ބޮޑު ވަޒީރު މައިކަލް މަރޓިން ވިދާޅުވީ "އަޅުގަނޑުމެންގެ ކުރިމަތީގައި އިޒްރޭލުން ދަނީ ނައްލު ނައްތާލަމުން" ކަމަށެވެ. އެއަށްފަހު އަޔަރލެންޑްގެ ޕާލަމެންޓުން ވަނީ އެކަމަށް ވޯޓުލައި ދެކުނު އެފްރިކާގެ ދަޢުވާގައި ބައިވެރިވުމަށް ނިންމާފައެވެ.
ދެކުނު އެފްރިކާއިން ވަނީ ޕިކަޕެއް ފުރެންދެން ފައިލްތަކާއެކު އިޒްރޭލާ ދެކޮޅަށް ހެކި ހުށަހަޅާފައެވެ.
ބިރުން ތިބި ބަލިކަށި އިސްލާމީ ޤައުމުތަކާ ޚިލާފަށް، އަޔަރލެންޑަކީ ޒަޔަނިސްޓުން ދެމުންދާ ޙަމަލަތަކާ ދެކޮޅަށް، ހަރުއަޑުން ބައިނަލްއަގްވާމީ މައިދާނުގައި ވަކާލާތު ކުރާ ނަސްރާނީ ގައުމެކެވެ.
ފަލަސްޠީނުން، ސަފީރާ ޖީލާން ވަހްބާ އަބްދުލްމަޖީދު އައްޔަން ކުރުމުން، އަޔަރލެންޑުން ވަނީ ފުރިހަމަ ޑިޕްލޮމެޓިކް އިމްތިޔާޒު އެރުވުމާއެކު އެކަމަނާ ބަލައިގެންފައެވެ.
