އެމެރިކާގެ ތާޑް މިސައިލްގެ ދިފާޢީ ނިޒާމަށް ވުރެން ވަރުގަދަ މިސައިލްގެ ދިފާޢީ ނިޒާމެއް މިއަދު ޗައިނާއިން ދައްކާލައިފިއެވެ. ޗައިނާގެ ސިފައިން ފުރަތަމަ ފަހަރަށް ދައްކާލި މިސައިލްގެ ދިފާޢީ ނިޒާމަކީ އެޗްކިއު-19 މިސައިލްގެ ނިޒާމެވެ.
މިއީ ބިމުން ޖައްވަށް ފޮނުވާލާ، ދުރުރާސްތާއަށް ދަތުރުކުރާ މިސައިލް ފޮނުވާލާ ނިޒާމެކެވެ.
މާނައަކީ ޖަޕާނާއި ފިލިޕީންސްއާއި އެދެ ގައުމަށް ވުރެން ދުރުން ޗައިނާއަށް އަންނަ ބެލެސްޓިކް މިސައިލް ގޮއްވާލުމުގެ ގާބިލުކަން މި ދިފާއީ ނިޒާމަށް ލިބިފައި ވާނެ އެވެ.
ޒުހާއި އެއަރ ޝޯގައި މިއަދު ދައްކާލި، 3ހާސް ކިލޯމީޓަރުގެ ރާސްތާއަށް ދަތުރުކުރާ މި މިސައިލް އިން ބެލެސްޓިކް މިސައިލް ޝިކާރަކޮށް ގޮއްވާލާނީ ދުނިޔޭގެ ބޭރު ފަށަލައިގައި މުޑިއަރުވައިގެންނެވެ.
މިއީ އެމެރިކާގެ ބެލެސްޓިކް މިސައިލްގެ ދިފާޢީ ނިޒާމަށް ވުރެން ބާރުގަދަ ނިޒާމެކެވެ. އެމެރިކާއިން ބޭނުން ކުރަނީ ބެލެސްޓިކް މިސައިލް ޝިކާރަ ކުރާ ތާޑް ނިޒާމްގެ އެންމެ 7 ނިޒާމެވެ. ޗައިނާއިން އެޗްކިއު-19 އާއި އެޗްކިޔު 9 އަދި އެޗްކިއު 22 ގެ ނިޒާމުތައް ބޭނުން ކުރެއެވެ. މާނައަކީ އެމެރިކާއަށް ވުރެން ގިނައިން ބެލެސްޓިކް މިސައިލް ޝިކާރަ ކުރާ މިސައިލްގެ ދިފާޢީ ނިޒާމު ޗައިނާގައި ބަހައްޓާފައި ވެއެވެ.
