ތައިލެންޑުގެ ވެރިރަށް ބެންކޮކްގައި ކުރިއަށްދާ ކޯޕް 13 އެމްއޯޕީ 36 ގެ މަތީ ފެންވަރުގެ ބައްދަލުވުމުގައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާރޖީގެ ޑެޕިއުޓީ މިނިސްޓަރ އަޙްމަދު ނިޒާމް ބައިވެރިވެވަޑައިގެން، މުހިންމު ވާހަކަފުޅުތަކެއް ދައްކަވައިފިއެވެ.
މި ބައްދަލުވުމަކީ އޯޒޯން ފަށަލަ ހިމާޔަތްކުރުމަށް ބޭއްވޭ މުހިންމު ބައްދަލުވުމެކެވެ. ބައްދަލުވުމުގައި ވާހަކަފުޅު ދައްކަވަމުން ޑެޕިއުޓީ މިނިސްޓަރ ނިޒާމް، ހަކަތައިގެ ޚަރަދު ކުޑަ ފިނިކުރުމުގެ ޓެކްނޮލޮޖީތަކަށް އިސްކަންދިނުމަށާއި، ދިވެހިރާއްޖެ ފަދަ ޤައުމުތަކުގެ ބޭނުންތައް ދެނެގަނެ، އެއާ އެއްގޮތަށް ލައިފްސައިކަލް ރެފްރިޖަރަންޓް މެނޭޖްމަންޓް އުސޫލުތައް ގެންގުޅުމަށް ގޮވާލައްވައިފިއެވެ.
ޑެޕިއުޓީ މިނިސްޓަރ ނިޒާމް ފާހަގަކުރެއްވި ގޮތުގައި، ދިވެހިރާއްޖެ ފަދަ ކުދި ޖަޒީރާ ޤައުމުތަކުގައި ފިނިކުރުމުގެ ޓެކްނޮލޮޖީތައް ބޭނުންކުރުމުގައި ދިމާވާ ގޮންޖެހުންތަކަށް ޚާއްޞަ ސަމާލުކަމެއް ދޭންޖެހެއެވެ. މީގެ އިތުރުން، އޯޒޯން ފަށަލައަށް ގެއްލުން ދޭ ގޭސްތައް މަދުކުރުމަށް ކުރެވޭ މަސައްކަތްތަކުގައި ދިވެހިރާއްޖެއިން އަބަދުވެސް އިސް ދައުރެއް އަދާކުރަމުން އަންނަކަން ވެސް އެމަނިކުފާނު ފާހަގަކުރެއްވިއެވެ.
ޑެޕިއުޓީ މިނިސްޓަރ ނިޒާމް އިތުރަށް ފާހަގަކުރެއްވި ގޮތުގައި، މި މަސައްކަތުގައި ބައިނަލްއަޤްވާމީ މުޖުތަމަޢުގެ އެހީތެރިކަމާއި އެއްބާރުލުން ވަރަށް މުހިންމެވެ. މި ބައްދަލުވުމުގައި ބައިވެރިވެ ވަޑައިގަތުމާއެކު، ޑެޕިއުޓީ މިނިސްޓަރ ނިޒާމް ވަނީ އޯޒޯން ފަށަލަ ހިމާޔަތްކުރުމަށް ކުރެވޭ މަސައްކަތްތަކުގައި ދިވެހިރާއްޖެއިން އަދާކުރާ ދައުރު ފާހަގަކޮށް، ބައިނަލްއަޤްވާމީ ފެންވަރުގައި ދިވެހިރާއްޖޭގެ އަޑު އިއްވާލައްވާފައެވެ.
