ޕާކިސްތާނާއި އަބޫދާބީ ޕޯޓްސް ގްރޫޕާއެކު ޕޯޓްސްއާއި ކަސްޓަމްސްއާއި އެއަޕޯޓް އިންފްރާސްޓްރަކްޗަރ ޑިވެލޮޕްކުރުމަށް އެއްބަސްވުމުގައި ސޮއިކޮށްފިއެވެ.
ޕާކިސްތާން ބޮޑުވަޒީރު އޮފީހުން އިއުލާން ކުރިގޮތުގައި މި ފަހުމުނާމާތަކުގައި ސޮއިކުރެއްވީ ޔޫއޭއީގެ މިނިސްޓަރު އޮފް ސްޓޭޓް ފޯ ފޮރިން ޓްރޭޑް ޑރ ތާނީ ބިން އަހުމަދު އަލް ޒައިދީ އެވެ. މި ސޮއިކުރުން އޮތީ ޕާކިސްތާން ބޮޑުވަޒީރު ޝެހްބާޒް ޝަރީފުގެ ހާޒިރުގައި ޔޫއޭއީގެ މަތީ ފެންވަރުގެ ވަފުދުގެ ދަތުރުފުޅެއްގައެވެ.
މި ފަހުމުނާމާތަކުން ޕާކިސްތާނާއި އަބޫދާބީ ޕޯޓްސް ގްރޫޕުން ގުޅިގެން ޑިޖިޓަލް ކަސްޓަމްސް ކޮންޓްރޯލް ހަރުދަނާ ކުރުމާއި، މުދާ އުފުލަން ޚާއްސަ ރޭލް ކޯރިޑޯތައް ތަރައްގީކުރުމާއި، ޕާކިސްތާނުގެ އާގުބޯޓުތަކުގެ ފްލީޓާއި ކަނޑުދަތުރުފަތުރުގެ ޚިދުމަތްތައް އަޕްގްރޭޑްކުރުމާއި، ބައިނަލްއަގްވާމީ އެއާޕޯޓްތަކުގެ ވަސީލަތްތައް އިތުރުކުރުމަށް މަސައްކަތް ކުރާނެއެވެ.
ޕާކިސްތާނުން ދަނީ ބޭރުފައިސާ ހޯދައި އިގްތިސާދު ދުޅަހެޔޮ ކުރާނެ ގޮތްތައް ހޯދަމުންނެވެ. އެގޮތުން ޝަހްބާޒް ޝަރީފް ވިދާޅުވީ ސޮފްޓްވެއަރ އެކްސްޕޯޓުކޮށްގެން 25 ބިލިއަން ޑޮލަރު ހޯދުމަށްވެސް ސަރުކާރުން އަމާޒު ހިފާފައިވާ ކަމަށެވެ.
