އިންޑިއާގެ އިސް މަސްއޫލުވެރިއަކު ކާބުލްގައި ބައްދަލުވުންތަކެއް ބާއްވަވައިފިއެވެ. މި ބައްދަލުވުން ކުރިއަށް ގެންގޮސްފައިވަނީ އިންޑިއާގެ ޚާރިޖިއްޔާގައި އަފްޣާނިސްތާނާއި ޕާކިސްތާނާއި އީރާނުގެ ޑެސްކާއި ހަވާލުވެ ހުންނެވި ޖޮއިންޓް ސެކްރެޓަރީ ޖޭޕީ ސިންގް އާއި ތާލިބާނުންގެ އެކްޓިން ޑިފެންސް މިނިސްޓަރު މައުލަވީ މުހައްމަދު ޔަޤޫބު މުޖާހިދާ އެކުގައެވެ.
ނޮވެމްބަރު މަހުގެ ފަސް ވަނަ ދުވަހު ބައްވާފައިވާ ބައްދަލުވުމުގައި ތާލިބާނުންގެ އެކްޓިން ފޮރިން މިނިސްޓަރު އަމީރު ޚާން މުއްތަގީ އާއި އަފްޣާނިސްތާނުގެ ކުރީގެ ރައީސް ހާމިދު ކަރުޒާއީ އާއި ވެސް ސިންގް ބައްދަލުކުރެއްވި އެވެ.
މިއީ މި އަހަރު އޭނާ ކާބުލްއަށް ކުރެއްވި ދެވަނަ ދަތުރުފުޅެވެ.
ރިޕޯޓްތައް ބުނާ ގޮތުގައި މި ބައްދަލުވުމުގައި އަލިއަޅުވާލާފައިވަނީ ދެ ފަރާތުގެ ގުޅުންތައް ބަދަހި ކުރުމަށާއި ޚާއްސަކޮށް އިންސާނީ އެހީ ދިނުމުގެ ދާއިރާގެ އެއްބާރުލުމާއި އަފްޣާނިސްތާނާއި އިންޑިއާއާ ދެމެދު މުއާމަލާތްތައް ހަރުދަނާ ކުރުމަށެވެ.
ބައިނަލްއަޤްވާމީ މުޖުތަމައުން އެއްބަސްވެފައިޥާ ގޮތަށް އިންޑިއާއިން، ޠާލިބާނުންގެ ވެރިކަން ބަލައެއް ނުގަނެއެވެ.
