ޕާކިސްތާނުގެ ޤައުމީ ޖަނަވާރު ކަމަށްވާ ދަޅު އެނބުރި ބަކަރި ޝިކާރަ ކުރުމަށް ޕާކިސްތާނުން ހުއްދަދޭ މައްސަލައަށް ނުރުހުން އަމާޒުވެއްޖެއެވެ. ދަޅު އެނބުރި ބަކަރިކަމަށްވާ އެސްޓަރ މާކޯރަކީ ޕާކިސްތާންގެ ގައުމީ ޖަނަވާރެވެ.
ދަޅު އެނބުރި ބަކައްޓަކީ 2022 ވަނަ އަހަރުން ފެށިގެން ފަނާވެގެން ދިއުމުގެ ނުރައްކާ ކުރިމަތިވެފައިވާ ބާވަތުގެ ޖަނަވާރެކެވެ.
ޕާކިސްތާނަށް އާމްދަނީ އިތުރު ކުރުމަށް މި ބަކަރި ޝިކާރަކުރުމުގެ ހުއްދަ ރެކޯޑް އަގެއްގައި ނީލަމުގައި ވިއްކާފައި ވެއެވެ. ބަކަރިއަކަށް، 37 މިލިއަން ޕާކިސްތާން ރުޕިސް (ގާތްގަނޑަކަށް 133،000 ޑޮލަރު) ހޯދާފައި ވެއެވެ.
ޖަނަވާރުތައް ޙިމާޔަތް ކުރުމަށް ތާއީދު ކުރާ މީހުން ވަނީ މި ކަމާމެދު ނުރުހުން ފާޅުކޮށްފައެވެ.
އޭގެ އިތުރުން ނެތި ހިނގައި ދާނެ ކަމަށް ބެލެވޭ، ހުބާރާ ބަސްޓާޑް ދޫނި ޝިކާރަ ކުރުމަށް ހުއްދަ ދޭ މައްސަލާގައިވެސް މީހުން ނުރުހުން ފާޅު ކުރެއެވެ. 2015 ވަނަ އަހަރު ސުޕްރީމް ކޯޓުން އެ ބާވަތުގެ ދޫންޏާއި ޖަނަވާރުތައް ޝިކާރަ ކުރުން މަނާކުރި ނަމަވެސް، ސިޔާސީ ގުޅުންތަކާ ގުޅިގެން ޕާކިސްތާނުން އަރަބި ޝާހީ އާއިލާތަކަށް ޝިކާރަ ކުރުމުގެ ޚާއްސަ ހުއްދަތައް ދޫކުރަމުން ދެއެވެ.
ސްނޯ ލެޕާޑަކީވެސް ޕާކިސްތާންގައި ނެތި ދިއުމުގެ ބިރު އޮތް ޖަނަވާރެކެވެ. ނަމަވެސް ސްނޯ ލެޕާޑެއް ޝިކާރަކޮށްފިނަމަ ޖުރިމާނާއަކީ، އެންމެ 275 ޑޮލަރަށެވެ.
ތަޖުރިބާކާރުން ބުނާ ގޮތުގައި ޖަނަވާރާއި ތިމާވެށި ޙިމާޔަތް ކުރމުގެ ސިޔާސަތުތައް ތަންފީޒުކުރުމަށް ޕާކިސްތާނުން ބަދަލުތަކެއް ނުގެންނަނީނަމަ، މިފަދަ ތަކެތި ޙިމާޔަތް ކުރުމަށް ކުރިމަގުގައި ބޮޑު ގޮންޖެހުމެއް ކުރިމަތިވާނެއެވެ.
