ޤަތަރުގައި ހުންނަ ހަމާސްގެ އޮފީސް ބަންދު ކުރުމަށް އެންގި ކަމަށް ބުނާ ވާހަކަތަކަކީ ޒަޔަނިސްޓް އިޒްރޭލުން އަނބުރާ ގޭސްގަނޑެއްކަމަށް އިޒްރޭލު ސިފައިންގެ ރޭޑިއޯގައި ވާހަކަ ދައްކަމުން ހަމާސްގެ އިސް ލީޑަރަކު ވިދާޅުވެއްޖެއެވެ. އާމީ ޜޭޑިއޯއިން ހަމާސް މަސްއޫލުވެރިޔާގެ ނަމެއް ނުބުނުނެއެވެ. އޭގެ އިތުރުން އިޒްރޭލު މީޑިއާގައި ހަމާސްގެ 3 ލީޑަރަކު ވަނީ އެފަދަ ވާހަކައެއް ޙަމާސްއަށް ޤަތަރު ސަރުކާރުން އަންގާފައި ނުވާ ކަމަށް ބުނެފައެވެ.
މީޑިއާ ރިޕޯޓުތައް ބަލާލުމުން މިއީ އިޒްރޭލު މީޑިއާއިން ފެށި ވާހަކައެއްކަނ ް އެނގެއެވެ.
އިޒްރޭލު މީޑިއާއިން މިވާހަކަ ފަތުރަމުން މިއަދު ބުނެފައި ވަނީ މީގެ 10 ދުވަސްކުރިން ޙަމާސްއަށް، ޤަތަރުން ބޭރުވުމަށް ދޯޙާ ސަރުކާރުން އަންގާފައި ވާނެ ކަމަށެވެ. އަދި އެ އެންގުމެއް އަންގާފައި ވަނީ އެމެރިކާ ސަރުކާރުން ޤަތަރަށް ފިއްތަމުން ދިއުމުގެ ސަބަބުން ކަމަށެވެ.
މިއަދާ ހަމައަށްވެސް ފަލަސްޠީނަށް އެންމެ ބޮޑު ގޮންޖެހުމެއް ކުރިމަތިވެފައި ވަނީ އަރަބި ލީޑަރުންގެ ފަރާތުން ކަމުން، މިފަދަ ކަމެއް ޤަތަރުން ނުކުރާނެއެކޭވެސް ނުބުނެވޭނެއެވެ.
ހަމާސް ޖަމާއަތުގެ މަސްއޫލުވެރިން ޤަތަރުން ބޭރުވުމަށް އެންގި ވާހަކައަށް ޤަތަރު ސަރުކާރުން އެއްޗެއް ނުބުނެއެވެ.
ނަމަވެސް ޤަތަރު ސަރުކާރުން ހިންގާ އަލްޖަޒީރާ އިން ވަނީ ރޮއިޓަޒްއާއި އަދި އެހެން މީޑިއާއާ ހަވާލާދީ މި ޚަބަރު ގެނަސްދީފައެވެ.
މިވާހަކައާ ފުށުއަރާ އެހެން ވާހަކައެއްގައި މިސްރުގެ އަލްއަޚުބާރު ނޫހުން ބުނެފައި ވަނީ މިއީ ހޮޅިވާހަކައެއް ކަމަށެވެ. އެ ނޫހުން ބުނީ އިޒްރޭލާއި ޙަމާސްއާ ދެމެދު ސީދާ ކުރިމަތީގައި ތިބެގެން ޤާހިރާގައި ވާހަކަތައް ކުރިއަށްދާ ކަމަށާއި ދެފަރާތުން ކުރިމަތީގައި ތިބެގެން އެންމެ ފަހުންވެސް ވާހަކަ ދައްކާފައި ވަނީ އެމެރިކާ މީހުން ވޯޓުލަމުން ދަނިކޮށް މިމަހުގެ 5 ވަނަ ދުވަހު ކަމަށެވެ.
އަނެއް ކޮޅުން އިޒްރޭލު މީޑިއާއިން ސީއެންއެންއާ ޙަލާދީވެސް ވާހަކައެއް ފަތުރާފައި ވެއެވެ. އޭގައި ބުނެފައި ވަނީ އެމެރިކާއަށް ނިސްބަތްވާ ހަނގުރާމައިގެ އަސީރުން މިނިވަންކުރަން އެ މަސްއޫލުވެރިޔާ ޓެރަރިސްޓް ޖަމާއަތެއްކަމަށް ސިފަ ކުރި "ޙަމާސްއިން ދެކޮޅު ހެދުމުން އެމެރިކާއިން ވަނީ އެމެރިކާ މީހުން ހިފަހައްޓައިގެން އުޅޭ ޖަމާއަތުގެ މަސްއޫލުވެރިންނަށް އެމެރިކާގެ ރަހުމަތްތެރި އެއްވެސް ގައުމަކުން ބޯހިޔާވަހިކަން ނުދިނުމަށް އަންގާފައި" ކަމަށެވެ.
މިއިން ދޭހަވަނީ، ހަނގުރާމައިގެ ޖަރީމާތައް ހިންގުމަށް ހަތިޔާރު ދޭ އެމެރިކާއިން އިޒްރޭލަށް ވާގިވެރިވުމަށް ޤައުމުތަކަށް މަޖުބޫރު ކުރަމުންދާ ގޮތާއި، ޙަމާސާއި ފަލަސްޠީނުގެ ހައްގުތައް ވަޅުޖައްސާލުމަށް އެމެރިކާއިން ފިއްތަމުން ގެންދާ ފިއްތުމެވެ!
