އެމެރިކާއިން ދީފައިވާ ހަތިޔާރު ބޭނުންކޮށްގެން މިއަދުގެ ފަތިސްގަޑީގައި ޒަޔަނިސްޓު ޓެރަރިސްޓް ސިފައިން ޣައްޒާގެ އުތުރުގެ ޖަބަލިއާއަށް ދިން ހަމަލާގައި 13 ކުޑަކުދިންނާއެކު ފަލަސްތީނުގެ 33 މީހަކު ޝަހީދުކޮށްލައިފި ކަމަށް ހެލްތު މިނިސްޓްރީން މިއަދު ބުނެފި އެވެ. ޒަޔަނިސްޓު މުޖުރިމުން ޖަބާލިއާ ރެފިއުޖީ ކޭމްޕް ވަށާލައިގެން އުޅޭތާ މިހާރު މަސްދުވަސް ވެއްޖެއެވެ.
އިޒްރޭލުން ވަނީ ބޮން އެޅުމަށްފަހު އެހީދޭން ދާން އުޅުނު މީހުންގެ ބޯމަތިން ޑްރޯން ދުއްވައި އެމީހުން ބިރު ގަންނަވާފައެވެ.
ޒަޔަނިސްޓު މުޖުރިމުންގެ ހަމަލަތަކާ ހެދި ތެލުގެ ދަތިކަމުގެ ސަބަބުން އުތުރު ޣައްޒާގައި އެމްބިއުލާންސްތައް ދުއްވުން ވަނީ ހުއްޓާލާފައެވެ.
ފަލަސްޠީނުގެ ވަފާ ނޫސް އެޖެންސީން ބުނި ގޮތުގައި ވައިގެ ހަމަލާގައި އަމާޒުކޮށްފައިވާ ގެއަކީ އެކި ހިސާބުތަކުން ވިއްސިވިހާލި ވަމުން އައިސްފައިވާ ރެފިއުޖީންނެވެ.
އެގޭގައި ތިބި އެންމެން ޝަހީދުކޮށްފައިވާ ކަމަށް އަލްޖަޒީރާ އިން ރިޕޯޓްކޮށްފައިވެއެވެ.
މީގެ އިތުރުން ފަލަސްތީނުގެ ރެފިއުޖީންނާ ބެހޭ އދ.ގެ އިދާރާ އުންރުވާއިން ބުނަނީ އުތުރު ޣައްޒާގައި ކާނާގެ ދަތިކަން އިހުސާސް ކުރަން ޖެހި ގައްޒާގައި ހައި ހޫނުކަމުގެ ކާރިސާއެއް ކުރިމަތި ވަނީ ކަމަށެވެ. އަދި ޣައްޒާގައި އޮކްސްފާމްގެ ފުޑް ސެކިއުރިޓީ ލީޑުން ވެސް ތަކުރާރުކޮށް ބުނީ އެއީ އުތުރު ޣައްޒާގައި "އިންތިހާއަށް ބޮޑު ނުތަނަވަސްކަމުގެ ހާލަތެއް" ކުރިމަތިވާ ކަމަށާއި ކާރިސާއެއް ހުއްޓުވުމަށް ބޭނުންނަމަ، މަދު ދުވަސްކޮޅެއްގެ ތެރޭގައި އަވަސް ފިޔަވަޅުތަކެއް އަޅަން ޖެހޭ ކަމަށެވެ.
