ރިޝްވަތުގެ ގޮތުގައި އެޕަލް އައިފޯން 16 ޕްރޯއެއް ގަބޫލް ކުރި އިންޑިޔާގެ ފުލުހުންގެ އިންސްޕެކްޓަރަކު ގުޖުރާތުގެ އެންޓި ކޮރަޕްޝަން ބިއުރޯ (އޭސީބީ) އިން މިއަދު ހައްޔަރު ކޮށްފިއެވެ.
ގުޖުރާތުގެ އެންޓި ކޮރަޕްޝަން ބިއުރޯ (އޭސީބީ) އިން މިއަދު ބުނީ ފުލުހުންގެ އިންސްޕެކްޓަރެއް ކަމުގައިވާ ދިނޭޝް ކުބާވަތީ ހައްޔަރު ކުރީ ފިއުލް ޑީލަރެއްގެ އަތުން ރިޝްވަތުގެ ގޮތުގައި 1.44 ލައްކަ ރުފިޔާގެ އެޕަލް އައިފޯން 16 ޕްރޯ ޑިމާންޑްކޮށް، ފޯނާ ހަވާލުވަމުން ދަނިކޮށް ރެޑްހޭންޑްކޮށް ކަމަށެވެ.
އިންސްޕެކްޓަރު ކުބާވަތީ މަސައްކަތް ކުރަމުން ދިޔައީ ނަވްސާރީ ޑިސްޓްރިކްޓުގެ ދޮލައި ޕޯޓުގެ މެރިން ޕޮލިސް ސްޓޭޝަނުގައެވެ.
"އިންސްޕެކްޓަރު ކުބާވަތީ ދާދި ފަހުން ދޯނި އަދި ބޯޓު ފަހަރުތަކަށް ތެޔޮ ވިއްކާޑީލަރު ކިބައިން އެދިފައި އޮތީ ލައިސަންސާއި ވިޔަފާރިއާ ގުޅުން ހުރި އެހެން ލިޔެކިޔުންތަކާ އެކު މެރިން ޕޮލިސް ސްޓޭޝަނުގައި ބައްދަލު ކުރުމަށް. އެ ބައްދަލުވުމުގައި އޭނާ ބުނެފައި ވަނީ ރިޝްވަތު ނުދީފި ނަމަ ވިޔަފާރި ބަންދު ކުރާނެ ކަމަށް. ކުބާވަތީ އަތުލައިގަތީ ނަވްސާރީ ޔުނިޓުގެ އޭސީބީންގެ ހުށިޔާރު ކަމުން" މީޑިޔާތަކަށް މިކަން ހިއްސާކުރި އޮފިޝަލް ވިދާޅުވި އެވެ.
