ބާލިން، 15 ނޮވެމްބަރ: ޖަރުމަނުގެ ޗާންސެލާ އޮލަފް ޝޮލްޒް އާއި ރަޝިޔާގެ ރައީސް ވްލަޑިމިއާ ޕޫޓިން މިއަދު ފޯނުން މަޝްވަރާ ކުރެއްވުމަށްފަހު ކުރިއަށް އޮތްތަނުގައި ގުޅުން ދަމަހައްޓަވަން އެއްބަސްވެފައިވާ ކަމަށް ޖަރުމަނު ސަރުކާރުގެ މަސްދުތަކާ ހަވާލާދީ ރަޝިޔާގެ ރަސްމީ ނޫސް އެޖެންސީ "ޓާސް" އިން ބުނެފިއެވެ.
"ޗާންސެލާ އޮލަފް ޝޮލްޒް އާއި ރަޝިޔާގެ ރައީސް ވްލަޑިމިއަރ ޕޫޓިން އެއްބަސްވެ ވަޑައިގަތީ މިހާރުން ފެށިގެން ގުޅުން ބަދަހި ކުރުމަށް. ޖަރުމަނު ސަރުކާރުން އިއްތިހާދުންނާއި ބައިވެރިންގެ އިތުރުން އީޔޫ އާއި ނޭޓޯގެ ލީޑަޝިޕަށް އެކަން އަންގާނެކަން ކަށަވަރު ކުރާނެ،" ޖަރިމަނުގެ މަސްދަރާ ހަވާލާދީ ޓާސްއިން ބުންޏެވެ.
ޖަރުމަނުގެ ޗާންސެލާ އޮލަފް ޝޮލްޒް އެންމެ ބޮޑަށް ކަންބޮޑުވެ ވަޑައިގަންނަވާ މައްސަލައަކީ ޔޫކްރައިނާ ދެކޮޅަށް ރަޝިޔާ ފައުޖުތަކާއެކު އުތުރު ކޮރެއާ ސިފައިން ހަނގުރާމަ ކުރަމުން އަންނަ މައްސަލައެވެ. މިކަން ރަޝިޔާއިން ދޮގެއް ނުކުރެއެވެ. ޗާންސެލާ ޝޮލްޒް ގަބޫލް ކުރައްވާ ގޮތުގައި އުތުރު ކޮރެއާގެ ސިފައިން ރަޝިޔާގެ ފައުޖުތަކާއެކު ހަނގުރާމަ ކުރަމުން ދިޔުމަކިީ ޔޫކްރައިން-ރަޝިޔާ މައްސަލަ ހައްލުނުވެ ދިގުލައިގެން ހިނގައިދާނެ ސަބަބެކެވެ. އަނެއްކޮޅުން ޔޫކްރައިނަށް ހަތިޔާރާއި އެހެނިހެން ގޮތްގޮތުން އެމެރިކާ ފިޔަވައި އެންމެ ބޮޑަށް މަދަދުވެރިވާ އެއްގައުމަކީ ޖަރުމަނެވެ. ޖަރުމަނުގެ ބަސްމަގަށް ބަދަލު އައިސްފައި މިވަނީ އެމެރިކާގެ ރައީސް ކަމަށް މީގެ ހަފްތާއެއްހައި ދުވަސް ކުރިން ޑޮނަލްޑް ޓްރަންޕް ހޮވިވަޑައިގަތްފަހުންކަން ފާހަގަ ކޮށްލެވެއެވެ. ޓްރަންޕަކީ ޔޫރަޕުގެ ބާރުތަކާއެކު ހަނގުރާމަތައް ކުރައްވަން ތާއީދު ކުރައްވާ ބޭފުޅެއް ނޫންކަން ފާހަގަ ކޮށްލެވެއެވެ.
