ދަރުމަވަންތަ ހޮސްޕިޓަލް، ސަރުކާރުގެ މައި ހޮސްޕިޓަލުގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު މިރޭ ރަސްމީކޮށް ހުޅުއްވައި ދެއްވައިފިއެވެ.
ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު މިރޭ ރަސްމީކޮށް ދަރުމަވަންތަ ހޮސްޕިޓަލް ހުޅުވައްދެއްވީ އެކަމަށްޓަކައި ބޭއްވި ރަސްމިއްޔާތުގައެވެ.
ދަރުމަވަންތަ ހޮސްޕިޓަލު ރަސްމީކޮށް ހުޅުވީ އެތަނުން މުޅިން އައު ޚިދުމަތްތައް ލިބޭނެ ފެންވަރަށް ތަރައްޤީ ކުރުމަށްފަހުއެވެ. މިގޮތުން ހައިބްރިޑް ކެތު ލެބާއި ކުޑަކުދިންނަށް ހާއްސަ އެމެޖެންސީ ރޫމަކާއި އައިސީޔޫއެއްގެ އިތުރުން ދަރިމައިވުމުގެ މައްސަލައަށް ފަރުވާ ދިނުމަށް ހާއްސަ ނެޝަނަލް ފާޓިލިޓީ ސެންޓަރެއް ދަރުމަވަންތަ ހޮސްޕިޓަލުގައި ވަނީ ގާއިމުކޮށްފަ އެވެ.
"މި ހައިބްރިޑް ކެތު ލެބަކީ ހިތާއި ނާރުތަކާއި އިންޓަވެންޝަނަލް ރޭޑިއޮލޮޖީގެ އިތުރުން އޮޕަރޭޝަނެއް ކުރަން ޖެހިއްޖެ ހާލަތެއްގައި ހައިބްރިޑް ތިއޭޓަރެއްގެ ވަސީލަތްތަކާއެކު ތައްޔާރު ކުރެވިފައިވާ ތަނެއް،" މިރޭގެ ރަސްމިއްޔާތުގައި ވާހަކަދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވިއެވެ.
ދަރުމަވަންތަ ހޮސްޕިޓަލް ބިނާ ކުރެއްވީ ކުރީގެ ރައީސް ޔާމީނުގެ ވެރިކަމުގައެވެ. އޭރު ހައުސިންގ މިނިސްޓަރަކަށް ހުންނެވީ މިހާރުގެ ރައީސް ޑޮކްޓަރ މުހައްމަދު މުއިއްޒެވެ. 2.2 ބިލިޔަން ޚަރަދު ކުރައްވައިގެން ބިނާ ކުރެއްވި ދަރުމަވަންތަ ހޮސްޕިޓަލް ފުރަތަމަ ހުޅުވީ 2019 ވަނަ އަހަރުއެވެ. އެކަމަކު ފާއިތުވެދިޔަ 5 އަހަރު މެއިންޓަނަންސް ރަނގަޅަށް ނުބެލެހެއްޓި އޮތުމުގެ ސަބަބުން، މި ސަރުކާރުން ހޮސްޕިޓަލާ ހަވާލުވިިއިރު، ތަނުގެ ހާލަތު އޮތީ ދަށްވެފައެވެ.
