ތަޢުލީމުރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް މިއަދަށް މިވީ އެއްއަހަރެވެ. މި އެއް އަހަރުގެ ތެރޭގައި އެކިއެކި ދާއިރާތަކުން ކުރިއެރުންތަކެއް ވަނީ ހޯދަވައިދެއްވާފައެވެ. މިގޮތުން ބަލާއިރު، ވަޒީރު ޑރ. މަރްޔަމް މާރިޔާގެ މޭސްތިރިކަމުގެ ދަށުން ، މަތީތަޢުލީމްގެ ދާއިރާއިންވެސް ވަނީ މި އެއް އަހަރުތެރޭގައި ފާހަގަކޮށްލަން ޖެހޭފަދަ ކާމިޔާބީތަކެއް، ކުރިއެރުންތަކެއް ހޯދަވައިފައެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާއަށް ވަނީ 10 ސިޔާސަތެއް މަތިކުރައްވާފައެވެ. މި ދެންނެވި ސިޔާސަތުތަކުގެ ދަށުން ގިނަކުރިއެރުންތަކެއް މި ވޭތުވެދިޔަ ކުރު މުއްދަތުގައި ވަނީ ހޯދަވައިފައެވެ.
މި ލިޔުމުގައި ބަލާލާނީ މި ސަރުކާރުގެ އެއްއަހަރުގެ ތެރޭގައި އިސްވެ ދެންނެވި ސިޔާސަތުތަކުން މަތީ ތަޢުލީމްގެ ފުރުޞަތުތައް ފުޅާކޮށް ދަރިވަރުންގެ ކާމިޔާބީ އިތުރުކުރުން މި ވުޒާރާއިން ހޯދާފައިވާ ކުރިއެރުންތަކަށެވެ.
މަތީ ތަޢުލީމްގެ ފުރުޞަތުތައް ފުޅާކޮށް ދަރިވަރުންގެ ކާމިޔާބީ އިތުރުކުރުން
މި ދާއިރާއިން މި އަހަރުގެ އޮކްޓޫބަރ މަހުގެ ނިޔަލަށް 67 ސްކޮލަރޝިޕް ސްކީމް އިޢުލާންކޮށް 420 ސްކޮލަރޝިޕް ފުރުސަތު ދެވިފައިވެއެވެ. އެއާއިއެކު މުޅި ޖުމްލަ 542 ދަރިވަރުން ސްކޮލަރޝިޕްތަކުގައި ތަޢުލީމް ހާސިލް ކުރަމުން އެބަދެއެވެ.
މިއަހަރުގެ ތެރޭގައި އަލަށް ހުޅުވާލި ސްޓޫޑެންޓް ލޯން ސްކީމްގެ ދަށުން 1284 ދަރިވަރުންނަށް ލޯންދޭން ނިންމިއެވެ. އެއާއިއެކު މިހާތަނަށް ޖުމްލަ 1532 ދަރިވަރުން ލޯނުގެ އެހީގައި ރާއްޖެއާއި ރާއްޖެއިން ބޭރުން ތައުލީމް ހާސިލް ކުރަމުން އެބަދެއެވެ. ހަމަ އެއާއިއެކު، މިއަހަރު އަލަށް 2350 ދަރިވަރުންނަށް މަތީތަޢުލީމް ހާސިލް ކުރުމަށް ވަނީ މާލީއެހީދެއްވާފައެވެ. އެހެންކަމުން މިވަގުތު ޖުމްލަ 11،972 ދަރިވަރުން މި ދެންނެވި އެހީގައި ދަނީ ތަޢުލީމް ހާސިލް ކުރަމުންނެވެ.
މީގެ އިތުރުންވެސް ކުރުމުއްދަތުގެ ތަމްރީންތަކަށްވެސް މި އަހަރުގެ ތެރޭގައިވަނީ ފުރުސަތު ހުޅުވާލެވިގެން ކުރިޔަށް ގެންދެވިފައެވެ. އެގޮތުން މިއަހަރު މިހާތަނަށް 382 ކުރު މުއްދަތުގެ ތަމްރީން ފުރުސަތުތައް ސަރުކާރުގެ އިދާރާތަކަށް ވަނީ ފަހިކޮށްދެވިފައެވެ.
މިއަހަރުގެ އޮކްޓޫބަރ މަހުގެ ނިޔަލަށް، މާލީ އެހީގެގޮތުގައި 14،258 ދަރިވަރުންނަށް 910،530،143.61 ރުފިޔާ ވަނީ ދޫކުރެވިފައެވެ.
ޔަޤީނުންވެސް މިއީ މަތީތައުލީމަށް ޑރ. މުޙައްމަދު މުޢިއްޒު ދެއްވަވާ އަޙްމިއްޔަތުކަންކަން ކަށަވަރެވެ.
މީގެ އިތުރުން ރާއްޖޭގެ ތައުލީމްއުގެނުމުގެ ވައްޓަފާޅި ޒަމާނީކޮށް އެކާވީސްވަނަ ޤަރުނުގެ ހުނަރުތައް ތަރައްޤީކުރުމަށްވެސް މި އަހަރުގެ ތެރޭގައި މިވަނީ ގިނަ މަސައްކަތްތަކެއް ކުރެވިފައެވެ. އެގޮތުން ސްޓްރެޓެޖީ އެކުލަވާލުމުގެ މަސައްކަތުގެ ފުރަތަމަ ޑްރާފްޓް ވަނީ ނިންމަވާފައެވެ. އަދި ދަރިވަރުންނަށް މަތީތައުލީމާއި ތަމްރީންގެ ފުރުސަތުތައް ހޯދައިދިނުމަށް މިއަހަރު މިހާތަނަށް އެކި ޤައުމުތަކާއިއެކު 5 އެމްއޯޔޫއެއްގައި ސޮއިކުރެވިފައިވެއެވެ.
ރާއްޖޭގެ ތަރައްޤީއަށް ބޭނުންވާ ދާއިރާތަކުން ދިވެހިން ބިނާކުރުމަކީވެސް މި ސަރުކާރުން ވަރަށް އިސްކަމެއް ދެއްވާ ކަމަކަށް ވާއިރު ބޭނުންވާ ޚާއްޞަ ޓެކްނިކަލް 22 ދާއިރާއެއް ދިވެހިންނަށް ޚާއްސަކޮށް، އެދާއިރާތަކުން މަތީތަޢުލީމްގެ ފުރުޞަތުތައް ފަހިކުރުމަށް އެކަށައެޅިފައިވެއެވެ.
ރާއްޖޭގެ އިޤްތިސާދުގެ މުހިންމު އެއްދާއިރާ، ފަތުރުވެރިކަމުގެ ދާއިރާއަށް ބޭނުންވާ މީހުން ބިނާކުރުމުގެ ދަށުން، އެދާއިރާގައި މަސައްކަތްކުރާ މުވައްޒަފުން ބޭރުގެ ބަސްތަކަށް އަހުލުވެރިކުރުމާއި، އެފަދަ ބަސްބަހުން މުއާމަލާތުކުރުމުގެ ހުނަރު ދަސްކޮށްދިނުމަށް، މެންޑަރިން، ފްރެންޗް، ޖާރމަން، ރަޝިއަން އަދި ކޮރެއަން ފަދަ ބަސްތަކަށް އަމާޒުކޮށް އަންނަ އަހަރު 200 ފުރުޞަތު ދިނުމަށްވެސް މިއަރުވަނީ އެކަށައަޅާފައެވެ. އަދި ޤައުމީ ޔުނިވާސިޓީގެ ފަސް ތަރީގެ ޓްރޭޑިންގ ރިސޯޓުގެ ކޮންސެޕްޓް ތައްޔާރުކޮށް، އެރިސޯޓް ޤާއިމުކުރުމަށް ލ. އަތޮޅުން ވަނީ ރަށެއް ކަނޑައަޅާފައެވެ.
މަތީ ތަޢުލީމް ލޯން ސްކީމަސް ކަނޑައެޅޭ ބަޖެޓްގެ ތެރެއިން އެންމެ މަދުވެގެން %50 ހުރިހާ ދާއިރާއެއްގެ ޓެކްނިކަލް ފީލްޑްތަކަށް ޚާއްސަކުރުމަށްވެސް ވަނީ ނިންމާފައެވެ.
މަތީތައުލީމް ހާސިލްކުރުމަށް އާއިލާ ދޫކޮށް މާލެއަށް އަންނަންޖެހޭޖެހުމުގެ މައްސަލައަށް ހައްލެއް ގެނެސްދެއްވާ ރަށްރަށުގައި ތިބެ ދަރިވަރުން އާއިލާ ތަކާއިއެކު ދަނާލުތަކުގައި ތައުލީމް އުގެނުމުގެ ފުރުސަތު ފަހިކޮށް ދެއްވުމަކީ ރައީސުލްޖުމްހޫރިއްޔާގެ ވަޢުދުފުޅެކެވެ. އެގޮތުން ޖުމްލަ 5 ރަށެއްގައި ދަރިވަރުންނަށް ޚާއްސަ ދަނާލު އެލުމަށް ޕްލޭންކޮށް، މިއަހަރު އެއްތަނުގެ އަމަލީ މަސައްކަތްވަނީ ފަށާފައެވެ. އަދި ބާކީ ހުރި ތަންތަން އަންނަ އަހަރުފަށާގޮތަށް ވަނީ ހަމަޖެހިފައެވެ. އަދި ޤައުމީ ޔުނިވާސިޓީއިން ގދ. ތިނަދޫގައި ޤާއިމުކުރާ އެ ޔުނިވާރސިޓީގެ ކެމްޕަސްގައި ތަރައްޤީކުރާ އައި.ސީ.ޓީ ފެސެލިޓީގެ މަސައްކަތް މިއަހުރުގެ ކުރީކޮޅުވަނީ ފަށާފައެވެ. ހަމަ އެއާއިއެކު އިސްލާމިކް ޔުނިވާސިޓީން ވަނީ ރާއްޖޭގެ 7 ރަށެއްގައި އައުޓްރީޗް އުސޫލުން ޢަރަބި ބަހުސް ދަސްކޮށްދިނުމުގެ ކޯސްތައްވެސް ފަށާފައެވެ. މީގެ އިތުރުން ރަށުގައި ތިބެގެން ކޯސްތައ ހެނދުމަށް ޝައުޤުވެރިކަން ފާޅުކޮށް، އެކަމަށް އެދިފައިވާ ގިނަ ރަށްތަކެއްގައި އިސްލާމިކް ޔުނިވާސިޓީން ވަނީ މުޅިން އަލަށް ޤުރުއާން ކޯސްތަކާއި ޢަރަބިބަހުގެ ކޯސްތައް ފަށާފައެވެ.
ދިވެހިރާއްޖޭގައި ކްރިއޭޓިވް އެކޮނޮމީއެއް ބިނާކުރުމުގެ ގޮތުން، ރާއްޖޭގެ ތާރީޚާއި ޘަޤާފަތާ ގުޅިފައިވާ ލިޔެލާޖެހުމާއި އަތްތެރި މަސައްކަތް ދަސްކޮށްދޭން "ނޭޝަނަލް ކަލްޗަރަލް ސެންޓަރ" ބ. ތުޅާދޫގައި ފެށުމުގެ މަސައްކަތް ކުރަމުން އަންނައިރު މެޑިކަލް ސްކޫލާއި 250 އެނދުގެ ޓީޗިންގ ހޮސްޕިޓަލާއި ނާރސިން ސްކޫލާއި ދަރިވަރުންނަށް ދާނާލު އެޅުމަށް ހުޅުމާލެއިން 2 ބިން ގަނެ މެޑިކަލް ސްކޫލާއި ޓީޗިން ހޮސްޕިޓަލް އެޅުމަށް މިހާރުވަނީ ޓެންޑަރ މަރުޙަލާ ފަށާފައެވެ.
ދިވެހިރާއްޖޭގެ ޤައުމީ ޔުނިވާސިޓީން ވަނީ އެމްއެންޔޫ ކޮލެޛް އޮފް ފިޝަރީޒް އެންޑް އޯޝަން ސައިންސަސް ޤާއިމުކޮށް، ކިޔަވައިދޭން ފާށާފައެވެ. އަދި އެތަނުގެ ދާއިމީ ކެމްޕަސް، ޔުނިވާރސިޓީގެ ސެންޓަރ ފޮރ މެރިޓައިމް ސްޓަޑީޒްގެ ވިލިމާލޭ ބިމުގައި އިމާރާތްކުރުމަށް، އެކަމަށް ޝައުޤުވެރިވާ ފަރާތްތައް ހޯދުމަށް އިޢުލާން ކޮށްފައެވެ.
ދަނޑުވެރިކަމަކީވެސް ރާއްޖޭގެ އިޤްތިސާދުގައި މުހިންމު ދާއިރާއަކަށް ހަދާ، ރާއްޖޭގެ އަމިއްލަ އުފެއްދުންތެރިކަން އިތުރުކޮށް ރައްކާތެރި ކާބޯތެކެތީގެ ކަށަވަރުކުރުމަށް އެދާއިރާތަކުން ދިވެހިން ބިނާކޮށް މަތީތައުލީމްގެ ފުރުސަތުތައް އެދާއިރާތަކުން ފުޅާކުރުމަކީ ސަރުކާރުގެ އަމާޒެކެވެ. މިގޮތުން އެދާއިރާއިން މަތީތައުލީމް ހާސިލް ކުރުމުގެ ފުރުސަތު ހޯދައިދިނުމަށް މި ވުޒާރާއިން ވަނީ ޖަޕާން އިންޓަރނޭޝަނަލް ކޯޕްރޭޝަން އޭޖެންސީ (ޖައިކާ)ގެ އެގްރިކަލްޗަރ ސްޓަޑީޒް ނެޓްވޯކް ފޮރ ފުޑް އެންޑް ސެކުރިޓީ 2025ގެ ދަށުން ދަނޑުވެރިކަމުގެ ދާއިރާއިން ތަމްރީނުވުމުގެ ސްކޮލަރޝިޕް ފުރުސަތުތަކެއް މިއަހަރު ސެޕްޓެންބަރ މަހު ހުޅުވާލައިފައިވެއެވެ. އޭގެ އިތުރުން އެމްއެންޔޫގެ "ފެކެލްޓީ އޮފް އެގްރިކަލްޗަރ އެންޑް ފުޑް ސައިންސް" އއ. ތޮއްޑޫގައި ޤާއިމްކުރުމަށް ނިންމިއެވެ. އަދި ދަނޑުވެރިކަމުގެ ދާއިރާއިން ކޯސްތައް ފަރުމާކުރުމަށްވެސް ވަނީ ފަށާފައެވެ.
ދިވެހިރާއްޖޭގެ އިސްލާމިކް ޔުނިވާސިޓީން ވަނީ ރ. އުނގޫފާރުގެ ިއސްލާމީ މަރުކަޒުގައި އެ ޔުނިވާސިޓީގެ ކޯސްތައް ރަސްމީކޮށް ފަށާފައިވާއިރު، ހިފްޒު އިމްތިޙާނު ފެށުމަށް އެކުލަވާލަންޖެހޭ އުސޫލުތައް އެކުލަވާލެވި، އިމްތިހާން ކޮމެޓީވެސް އެކުލަވާލާ، އިމްތިހާން ކުރަން ފެށުމަށް ވާންޖެހޭ އެންމެހާ އިންތިޒާމްތަކެއްވެސް ވަނީ ނިމިފައެވެ.
ރާއްޖޭގެ ޔުނިވާސިޓީގެ ފެންވަރު އިތުރަށް ރަގަޅުކޮށް ރާއްޖޭގެ ޔުނިވާސިޓީތަކުން އިންޓަރނޭޝަނަލް ދަރިވަރުން ތައުލީމް އުގެނޭ ތަންތަނަށް ހެދުމަކީވެސް މި ސަރުކާރުގެ އަމާޒެކެވެ. އެހެންކަމުން ކްރިއޭޓިވް އެކޮނޮމީގެދަށުން އިންޓަރނޭޝަނަލް ދަރިވަރުން އިތުރުކުރުމުގެ މަސައްކަތް ވަނީ ފަށާފައެވެ. އަދި މިވަގުތުވެސް ދިވެހިރާއްޖޭގެ ޤައުމީ ޔުނިވާސިޓީގައި އިންޓަރނޭޝަނަލް ދަރިވަރަކު ތަޢުލީމް ހާސިލް ކުރަމުންދާކަން ފާހަގަކޮށްލަމެވެ.
މީގެ އިތުރުން މިއަހަރުގެ މިހާތަނަށް ދިވެހި ރާއްޖޭގެ އިސްލާމިކް ޔުނިވާސިޓީ އަދި ދިވެހިރާއްޖޭގެ ޤައުމީ ޔުނިވާސިޓީން ވަނީ ކާމިޔާބު ބައިނަލް އަޤްވާމީ 4 ކޮންފަރެންސްއެއް ވެސް ބާއްވާފައެވެ.
https://sarukaaru.gov.mv/articles/5798
