ރޯޑް ޑެވެލޮޕްމަންޓް ކޯޕަރޭޝަން (އާރުޑީސީ) ގެ މެނޭޖިންގ ޑިރެކްޓަރ އަލީ ޒުހެއިރު އަދި ކުންފުނީގެ އިސްވެރިން، އދ. މަހިބަދޫ ކައުންސިލްގެ މެންބަރުންނާ ބައްދަލު ކުރައްވައިފިއެވެ.
މި ބައްދަލުވުމުގައި އެ ރަށުގެ މަގު ހެދުމުގެ މަޝްރޫއާއި ގުޅޭގޮތުން މަޝްވަރާ ކުރެވުނުކަމަށް އާރްޑީސީއިން ވިދާޅުވިއެވެ.
މަހިބަދޫ މަގުތައް ތަރައްޤީކުރުމުގެ މަޝްރޫޢުގެ ދަށުން މަގުތަކުގައި ތާރު އެޅުމާއި މަގުތަކާއި ސްޓޯމް ވޯޓަރ ހިންދުމުގެ ނިޒާމެއް ގާއިމްކުރުމާއި، މަގުތަކުގައި ބޭނުންވާ ހުރިހާ ފާހަގަތަކެއް ކުރެހުމާއި، ސްޕީޑް ބްރޭކަރ އަދި މަގު ބައްތި ހަރުކުރުން ވެސް މި މަޝްރޫޢުގެ ތެރޭގައި ހިމެނޭ ކަމަށް އާރްޑީސީއިން ވިދާޅުވިއެވެ.
މީގެ އިތުރުން، ޕޭވްމަންޓު އެޅުމާއި، ޑްރެއިނޭޖް ގަޓަރުތައް ހެދުމާއި، ކުރިމަގުގައި ބޭނުންވާނެ ޔުޓިލިޓީ ލައިންތަކަށް ޖަންކްޝަން ހެދުމާއި، ގަސްއިންދުމަށް ޕިޓު ހެދުމާއި، ކާބްސްޓޯން އެޅުން ފަދަ މަސައްކަތްތައްވެސް ހިމެނެއެވެ.
މި މަޝްރޫޢު ފެށުމުން މަހިބަދޫގެ މަގުތަކުގެ ޙާލަތު ރަނގަޅުވެ، ރައްޔިތުންނަށް ލުއިފަސޭހަކަން ލިބިގެންދާނެ ކަމަށް ބެލެވެއެވެ. މި މަޝްރޫޢުގެ މަސައްކަތް ފެށޭނެ ތާރީޚެއް އަދި ހާމަކުރައްވާފައެއް ނުވެއެވެ.
މި މަޝްރޫއުއަކީ 43 މިލިއަން ރުފިޔާގެ މަޝްރޫއުއެކެވެ.
