އިޒްރޭލުގެ ހާރެޓްޒް ނޫހުން ބުނަނީ ހިފާފައިވާ ފަލަސްޠީނުގެ އުތުރުގައި އިޒްރޭލުން އިންދާފައިވާ ބަސްތީތަކުގައި ވިޔަފާރިތައް ގެއްލި، އެތަންތަނަށް ޒިޔާރަތްކުރާ މީހުންނެއް ނެތް ކަމަށެވެ. ޙިޒުބުﷲއިން އިޒްރޭލާ ދެކޮޅަށް މައުލޫމާތުގެ ރަސްމަގުގައި ހިންގަމުން ގެންދާ ހަނގުރާމައިގައި އެންމެ ބޮޑަށް ގެއްލުން ދައްކަނީ މި ސަރަހައްދުތަކަށެވެ.
ޙިޒުބުﷲއާއި ޙިޒުބުގެ ސަޕޯޓަރުން ދަނީ ގްލޯބަލް ޕޮޒިޝަނިން ސިސްޓަމް (ޖީޕީއެސް) ގައި މިތަންތަން ހުންނަނީ ލުބުނާންގެ ދެކުނުގައި ކަމަށް ދައްކަމުންނެވެ.
އެހެންވެ، މީސްމީޑިއާގައި އެތަންތަން ޕްރޮމޯޓް ކުރުމުން ފައިސާ ގެއްލި ވިޔަފާރި ގެއްލޭކަމަށް ޔަހޫދުން ބުނެއެވެ.
ހާރެޓްސްއިން ބުނީ، މީގެ ދެ ހަފްތާއެއްހާ ދުވަސް ކުރިން ޒަޔަނިސްޓުންގެ ގާނޫނު ހަދާ މަޖިލީހުގެ ކޮމިޓީގައިވެސް ގެއްލުން ލިބިފައިވާ މީހުންނަށް ބަދަލު ދިނުމަށް މަޝްވަރާކޮށްފައިވާ ކަމަށވެ. އެ ކޮމިޓީގެ މައުލޫމާތުތަށް ބަލާއިރު ހިފާފައިވާ ފަލަސްޠީނުގެ އުތުރުގައި އިންދާފައިވާ ތަންތާނގައި 100،000 ކުންފުންޏަކަށް އިގްތިސާދީ ގެއްލުންތަކެއް ކުރިމަތިވެފައިވާ ކަމަށް ލިސްޓްކޮށްފައި ވެއެވެ. އޭގެ އިތުރުން މެޑެޓެރޭނިއަން ކަނޑައަށް އޮންނަ ފަލަސްޠީނުގެ ހައިފާ ސިޓީގެ 76 ހާހަށް ވުރެ ގިނަ ކުންފުނި ވެސް ވަނީ ބަނގްރޫޓުވެގެން މާލީ އެހީއަށް އެދިފައެވެ.
ހައިފާގެ ޕަބްލިކް ރިލޭޝަންސް ކުންފުންޏަކުން ހާރެޓްސްއަށް ކިޔައި ދިން ގޮތުގައި ދިހަހާސް ޝޭކާލްގެ ބަޖެޓަކުން، ޕްރޮމޯޝަން މަސައްކަތް ކޮށްފައި އަނެއް ދުވަހު ހޭލައިގެން ބަލާލާއިރު ޕްރޮމޯޓު ކުރާތަން އޮންލައިންކޮށް ދައްކަނީ ދެކުނު ލުބުނާންގައި އޮންނަ ކަމަށެވެ.
އޭނާ ބުނީ އެހެންވެ، ކުންފުނިތަކުން އޮންލައިންކޮށް އިޝްތިހާރުކުރުން ހުއްޓާލާފައިވާ ކަމަށާއި ފަތުރުވެރިންގެ ގޮތުގައި އެތަންތަނަށް ދާނެ މީހަކުވެސް މިހާރު ނުވާކަމަށެވެ.
އިޒްރޭލުގެ ޗެނަލް 12 އިން ރިޕޯޓު ކުރާ ގޮތުގައި ފަލަސްޠީނުގެ މިނިވަންކަމުގެ ހަނގުރާމަ ފެށިފަހުން، އުތުރު ފަލަސްޠީނުގައި ވަޒަންވެރިކޮށްފައިވާ ޔަހޫދުންގެ ތެރޭން ވަޒީފާ ނެތް މީހުންގެ އަދަދު އެހެން ސަރަހައްދުތަކަށް ވުރެ %20 އިތުރުވެފައި ވެއެވެ.
މެދު ނުކެނޑި ހިޒްބުالله އިން ޙަމަލަތައް ދެމުންދާއިރު އެހަމަލާތައް އަމާޒުކޮށްފައި ވަނީ ސިނާއަތާއި ދަނޑުވެރިކަމާ ގުޅޭ ދާއިރާތަކަށް ކަމުން، އެކަމުގެ ގެއްލުން ޔަހޫދުން ދަނީ އިހުސާސް ކުރަމުންނެވެ.
