އަންނަ އަހަރުގެ އޭޕްރީލް މަހުން ފެށިގެން، ރެޒޯޓްތަކަށް އަންނަ ކޮންމެ ޓުއަރިސްޓެއްގެ ބޮލަކަށް 500 ޑޮލަރު، ދިވެހި ބޭންކަކަށް މާރު ކުރަން ޖެހޭ ގޮތަށް ހެދި ޤަވައިދު ބަދަލު ނުކުރައްވާނެކަން ވަރަށް ސާފު ސީދާ އިބާރާތުން ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް މިހެން ވިދާޅުވީ، މި ސަރުކާރަށް 1 އަހަރު ފުރުން ފާހަގަ ކުރުމަށް މިހާރު ސޯޝިއަލް ސެންޓަރުގައި ބާއްވަމުން ގެންދާ ޖަލްސާގައި ވަރަށް ފޯރީގައެވެ.
"މިކަމުގައި (ޑޮލަރު މާރުކުރަން ހެދި ގަވައިދު) އަޅުގަނޑުމެން ނެތިން ގަވައިދު ބަދަލު ކުރާކަށް. ވަރަށް ސާފުކޮށް މިދެންނެވީ ގަވައިދު ބަދަލެއް ނުކުރާނަމޭ. ވަރަށް ސާފުކޮށް މިދެންނެވީ ގަވައިދު ބަދަލެއް ނުކުރާނަމޭ. ފައްސަތޭކަ ޑޮލަރު މާރުކުރައްވަން ޖެހިވަޑައިގަންނަވާނޭ. ގަވައިދަށް ތަބާވުމަކީ އެންމެންގެ މައްޗަށް ލާޒިމު ކަމެކޭ" ރައީސް ވަރަށް ޖޯޝުގައި ވިދާޅުވިއެވެ.
ރައީސްގެ ވާހަކަ ކޮޅާއެކު ސޯޝިއަލް ސެންޓަރުގައި ތިއްބެވި ބޭފުޅުން ވަނީ ރައީސްގެ ވާހަކަފުޅަށް ވަރަށް ހޫނު ތަރުހީބެއް ދެއްވާފައެވެ.
ޑޮލަރު މާރު ކުރަން ހެދި ގަވައިދު ބަދަލު ނުކުރައްވާނެ ކަމަށް ރައީސް ވިދާޅުވެފައި މިވަނީ، ރާއްޖޭގައި ރެޒޯޓް ހިންގަވާ ބޮޑެތި ބައެއް ވިޔަފާރިވެރިން މި ގަވައިދު އުވާލެއްވުމަށް ރައީސަށް ސިޓީ ފޮނުވާފައި ވަނިކޮށެވެ.
