ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އެ ކުންފުނީގެ އިންޖީނުގެތައް ހިންގާނެގޮތުގެ އަތްމަތީ ފޮތް ޕްރިންޓް ކުރުމުގެ މަސައްކަތް ކޮށްދޭނެ ފަރާތެއް ހޯދުމަށް އަލުން އިޢުލާންކޮށްފިއެވެ.
މި މަސައްކަތަށް ކުރިން ކުރެވުނު އިޢުލާނަށް އެކަށީގެންވާ ތަރުހީބެއް ލިބިފައިނުވާތީ، އެ އިޢުލާން ބާޠިލްކޮށް އަލުން މި މަސައްކަތަށް އަންދާސީހިސާބު ހުށަހެޅުމުގެ ފުރުސަތު ހުޅުވާލާފައިވާ ކަމަށް ސްޓެލްކޯއިން މިއަދު ނެރުނު އިޢުލާނެއްގައި ބުނެފައިވެއެވެ. މި މަސައްކަތަށް އަގު ހުށަހެޅުމުގެ ފުރުސަތު ރާއްޖެއާއި ރާއްޖެއިން ބޭރުގެ ފަރާތްތަކަށް ވެސް ހުޅުވާލާފައިވާ ކަމަށް އެ އިޢުލާނުގައި ބުނެފައިވެއެވެ.
މި މަސައްކަތް ކޮށްދިނުމަށް ޝައުގުވެރިވާ ފަރާތްތަކުން 2024 ނޮވެންބަރު 21 ވާ ބުރާސްފަތި ދުވަހުގެ 11:30 އަށް ސްޓެލްކޯއަށް ހާޒިރުވެ މަޢުލޫމާތު ސާފުކުރުމަށް އެ ކުންފުނިން އަންގާފައިވެއެވެ. އަދި މި މަސައްކަތަށް އަންދާސީހިސާބު ހުށަހެޅޭނީ މަޢުލޫމާތު ދިނުމުގެ ބައްދަލުވުމުގައި ބައިވެރިވާ ފަރާތްތަކަށް އެކަނި ކަމަށްވެސް ބުނެފައިވެއެވެ.
އަންދާސީހިސާބު ހުށަހެޅުމުގެ ސުންގަޑިއަކީ 2024 ނޮވެންބަރު 26 ވާ އަންގާރަ ދުވަހުގެ 11:30 އެވެ. އަންދާސީހިސާބު ހުށަހަޅަންވާނީ ސްޓެލްކޯގެ ހެޑް އޮފީހުގެ ދެވަނަ ފަންގިފިލާގެ ބައްދަލުކުރާ ކޮޓަރިއަށްކަމަށް އެ ކުންފުނިން މަޢުލޫމާތުދެއެވެ.
މި މަސައްކަތަށް ހުށަހަޅާ، ޓެކްނިކަލް ގޮތުން ގަބޫލުކުރެވޭ ހުށަހެޅުންތައް އިވެލުއޭޓް ކުރާނީ އަގަށް 80 ޕޮއިންޓް، މުއްދަތަށް 15 ޕޮއިންޓް އަދި ތަޖުރިބާއަށް 5 ޕޮއިންޓް ދީގެންނެވެ.
މި މަސައްކަތާ ގުޅޭ އިތުރު މަޢުލޫމާތު ސާފުކުރުމަށް ސްޓެލްކޯގެ 3338121 ނުވަތަ 3338123 ނަންބަރު ފޯނަށް ގުޅުމަށް އެ ކުންފުނިން އަންގާފައިވެއެވެ.
