ޗެމްޕިއަންސް ލީގް ފައިނަލުގައި 2018 އަދި 2022 ގައި ރެއާލް މެޑްރިޑް އަތުން ހިތްދަތިކޮށް ބަލިވި ބަލިވުމުގެ ބަދަލު ލިވަޕޫލުން ރޭ ރެއާލް ކިބައިން ހިފައިފިއެވެ.
ލިވަޕޫލްގެ އެންފީލްޑުގައި ކުޅުނު ފޯރިގަދަ މިމެޗް ލިވަޕޫލުން ކާމިޔާބު ކުރީ 2-0 އިންނެވެ. ލިވަޕޫލަށް ލަނޑު ޖަހައިދިނީ 52 ވަނަ މިނެޓުގައި އާޖެންޓީނާ ގައުމީ ޓީމުގެ މިޑްފީލްޑަރު މެކް އެލިސްޓާ އާއި 76 ވަނަ މިނެޓުގައި ނެދަލޭންޑްސް ގައުމީ ޓީމުގެ ފޯވާޑް ކޯޑީ ގަކްޕޯއެވެ.
ގަކްޕޯ ލަނޑު ޖެހުމުގެ ކުރިން ނަތީޖާ ހަމަހަމަ ކުރަން ރެއާލްއަށް ޕެނަލްޓީއެއް ލިބުނެވެ. އެކަމަކު ކިލިއަން އެމްޕައްބޭ ޕެނަލްޓީ ފޮނުވާލުމުން އޮދަރަން ކެލެހާ ދިފާއު ކުރީއެވެ. ރެއާލްއަށް ޕެނަލްޓީ ކާމިޔާބު ނުކުރެވުމުގެ ޕްރެޝަރުގަނޑުގައި ދެން ޕެނަލްޓީ ލިބުނީ ލިވަޕޫލަށެވެ. މިސްރުގެ ތަރި މުހައްމަދު ސަލާހް ޕެނަލްޓީ އަރިމަތީ ދަނޑީގައި ޖެހުމަށްފަހު ދިޔައީ ބޭރަށެވެ. ގަކްޕޯގެ ލަނޑު ފެނިގެންދިޔައީ މި ދެ ޕެނަލްޓީއަށްފަހުއެވެ.
މިމެޗުން ބަލިވުމުގެ ސަބަބުން ރެއާލް ވަނީ 36 ކްލަބު ވާދަކުރާ ޗެމްޕިއަންސް ލީގް ގްރޫޕް ސްޓޭޖުގެ 24 ވަނައަށް ވެއްޓިފައެވެ. ޗެމްޕިއަންސް ލީގް މިހާރު ކުރިއަށް ގެންދާ ފޯމެޓުން، ދެވަނަ ބުރުން ޖާގަ ލިބޭނީ ގަދަ 8 ކްލަބަށެވެ. ތާވަލުގެ 9-24 އަށް ފުރުސަތު ލިބޭނީ ޕްލޭ އޮފުންނެވެ. އެއަށްވުރެ ފުލަށް ގޮސްފިނަމަ ގްރޫޕް ސްޓޭޖުން ކެޓީއެވެ. ލިވަޕޫލަށް، 15 ޕޮއިންޓާއެކު އެޓީމު އޮތީ ތާވަލުގެ ކުރީގައެވެ. ދެވަނައިގައި އިންޓަމިލާން އޮތްއިރު ތިންވަނައިގައި އޮތީ ބާސެލޯނާއެވެ.
