ކ. ގާފަރު ސްކޫލާއި އދ. ދަނގެތީ ސްކޫލު ބައެއް ދަރިވަރުން ފުލުހުންގެ އިދާރާއަށް ޒިޔާރަތްކޮށްފިއެވެ.
ފުލުހުން ބުނީ މި މަހު 26 ވަނަ ދުވަހު ދެ ސްކޫލުގެ ދަރިވަރުން އިސްކަންދަރު ބިލްޑިންގއަށް ކުރި މި ޒިޔާރަތުގައި ފުލުހުންގެ އިދާރާގައި ހުރި ވަޒީފާގެ ފުރުސަތުތަކާއި ފޮރެންސިކް މަސައްކަތްތަކާ ގުޅޭގޮތުން މައުލޫމާތު ދީފައިވާ ކަމަށެވެ.
އެގޮތުން، ފުލުހުންގެ އިދާރާ މައިގަނޑު ގޮތެއްގައި ބެހިފައިވާ ދާއިރާތަކާއި، ފުލުހުންގެ ދައުރަކީ ކޮބައިކަމާއި، މި ދާއިރާގައި ދަރިވަރުންނަށް ހުރި ފުރުސަތުތަކުގެ މައުލޫމާތު ހިއްސާކޮށްފައިވާ ކަމަށާއި އަދި ސްކޫލު ދައުރު ނިމި ވަޒީފާގެ މައިދާނަށް ނުކުންނައިރު ވިސްނަންޖެހޭ ކަންކަމުގެ މައުލޫމާތު ވެސް ހިއްސާކޮށްފައިވާ ކަމަށްވެސް ބުނެފައިވެއެވެ.
ފުލުހުން އިތުރަށް ބުނީ އެ ހިދުމަތުގެ ފޮރެންސިކް ޑިޕާޓްމަންޓުގެ މަސައްކަތްތަކާއި އެކި ސީންތަކުން ފޮރެންސިކް ހެކި ހޯދުމުގައި އަމަލުކުރާ ގޮތްތައް ބުނެދީފައިވެއެވެ. އަދި ފިންގަރ ޕްރިންޓު ނަގާ ގޮތްތައްވެސް ކިޔައިދީފައިވާ ކަމަށެވެ.
މި ޒިޔާރަތުގައި ދެ ސްކޫލުން 38 ދަރިވަރުން ބައިވެރިވިއެވެ. އެއީ ގާފަރު ސްކޫލުގެ 23 ދަރިވަރުންނާއި ދަނގެތީ ސްކޫލުގެ 15 ދަރިވަރުންނެވެ.
