ޗައިނާ މީހުންނަށް ޕާކިސްތާންގައި ނުރައްކާ ކުރުމަކީ ޗައިނާއިން ޕާކިސްތާނާއެކު ބާއްވާ މަޝްވަރާތަކުގެ އެންމެ އަސާސީ ނުކުތާއެވެ. ބުދަދުވަހު ބާއްވާފައިވާ މަޝްވަރާތަކުގައިވެސް ދެ ގައުމގެ ސިފައިން ވާހަކަ ދައްކާފައިވަނީ ޗައިނާ ރައްޔިތުންނާ ދެކޮޅަށް ދޭ ޓެރަރިސްޓް ހަމަލަތަކާ ބެހޭ ގޮތުންނެވެ.
ޗައިނާގެ ސެންޓްރަލް މިލިޓަރީ ކޮމިޝަން (ސީއެމްސީ)ގެ ވައިސް ޗެއާމަން އަދި ޗައިނާގެ އެންމެ އިސް ދެ އަސްކަރީ ލީޑަރުންގެ ތެރެއިން އެއް ލީޑަރު ކަމަށްވާ ޖެނެރަލް ޒާންގް ޔޫކްސިއާ ޕާކިސްތާނަށް ވަޑައިގެންފައި ވަނީ މަތީ ފެންވަރުގެ ވަފުދަކާ އެކުގަ އެވެ.
ޖެނެރަލް ޒާންގް ވަނީ ސިފައިންގެ އިސްވެރިޔާ ޖެނެރަލް އާސިމް މުނީރާ އެކު އެކަހެރި ބައްދަލުވުމެއް ބާއްވަވާފައެވެ. އޭގެ ފަހުން ވަފުދު ފެންވަރުގެ މަޝްވަރާތަކެއް ކުރިއަށް ގެންގޮސްފައި ވެއެވެ.
ޕާކިސްތާން ސިފައިން ނެރުނު ބަޔާނެއްގައިވާ ގޮތުން މި މަޝްވަރާތަކުގައި ބޮޑަށް އަލިއަޅުވާލާފައިވަނީ "ދެފަރާތުގެ މަސްލަހަތު ހުރި ކަންކަމާއި، ސަރަހައްދީ ސަލާމަތީ ޑައިނަމިކްސް އާއި، ސަރަހައްދީ ހަމަޖެހުމަށް އަޅާ ފިޔަވަޅުތަކާއި، ދެގައުމުގެ ދިފާއީ އެއްބާރުލުން އިތުރުކުރުމަށެވެ."
ޖެނެރަލް ޒާންގް ވަނީ ޕާކިސްތާނުގައި މަސައްކަތްކުރާ ޗައިނާގެ ރައްޔިތުންނަށް އަމާޒުކޮށްގެން ދެމުންދާ ޓެރަރިސްތް ހަމަލާތައް އިތުރުވަމުންދާތީ ދެގައުމުގެ މެދުގައި މަޝްވަރާގެ މުހިންމު މައުޟޫއަކަށް އެކަން ވާން ޖެހޭ ކަމުގައި ވިދާޅުވެފައެވެ. އަދި ޓެރަރިޒަމާ ދެކޮޅަށް ޕާކިސްތާނުން ކުރަމުންދާ މަސައްކަތާ ބެހޭ ގޮތުން މައުލޫމާތު ސާފު ކުރައްވާފައެވެ.
ޕާކިސްތާނުގައި ތިބި ރައްޔިތުންގެ ރައްކާތެރިކަން ކަށަވަރުކުރުމުގައި ބެއިޖިން އިން އިތުރަށް ޕްރޮއެކްޓިވް ދައުރެއް އަދާކުރާ ކަމަށް މީޑިއާ ރިޕޯޓްތައް ބުނެއެވެ. އެގޮތުން ޗައިނާ ސިފައިން ޕާކިސްތާންގައި ބޭތިއްބުމަށް ޗައިނާއިން ބޭނުންވެއެވެ. ނަމަވެސް ޕާކިސްތާންގެ ފޮރިން އޮފީހުން ވަނީ ދެ ގައުމުން ޓެރަރިޒަމާ ދެކޮޅަށް އެއްބާރުލުން ދިނުމަކީ އެކަކު އަނެކެއްގެ އިސްތިގުލާލަށް އިހުތިރާމް ކުރުމުޖގެ އަސާސީ ކަމެއް ކަމަށް ފާހަގަކޮށްފަ އެވެ.
ސަރަހައްދީ ހަމަޖެހުމުގައި ދެ ފަރާތުން ވަނީ މި ސަރަހައްދުގައި އިންޑިއާއިން އަދާކުރާ ދައުރާއި އަފްޣާނިސްތާނުގައި ހިނގަމުންދާ ކަންކަމާ ބެހޭ ގޮތުން ވެސް ޚިޔާލު ބަދަލުކޮށްފަ އެވެ.
ސީއެމްސީގެ ނައިބު ރައީސްގެ މި ދަތުރުފުޅަކީ އޯގަސްޓް މަހުގެ ފަހުކޮޅު ޕީޕަލްސް ލިބަރޭޝަން އާމީގެ ގްރައުންޑް ފޯސަސްގެ ކޮމާންޑަރު ޖެނެރަލް ލީ ކިއާއޮމިންގް ޕާކިސްތާނަށް ކުރެއްވި ދަތުރަކާއި ގުޅިގެން ކުރައްވާ ދަތުރުފުޅެކެވެ.
މީގެ އިތުރުން ޗައިނާ ސިފައިން މިހާރު ދަނީ ޕާކިސްތާނުން ބާއްވާ ޖޮއިންޓް އަސްކަރީ ތަމްރީނެއް ކަމަށްވާ ވޮރިއަރ-VIII ގައި ބައިވެރިވަމުންނެވެ. މި ތަމްރީން ޑިސެމްބަރު މަހުގެ މެދުތެރެއާ ހަމައަށް ކުރިއަށްދާ ނެއެވެ. މި ޑްރިލްތަކުގެ މަގުސަދަކީ ޖޮއިންޓް ކައުންޓަރ ޓެރަރިޒަމް އޮޕަރޭޝަނަލް ކެޕޭސިޓީ އިތުރުކުރުމެވެ.
