ސްރީލަންކާއަށް ދިމާވި ޠޫފާނުގައި ބޯކޮށް ވެހި ފެންބޮޑުވުމުން 250،000 އަށް ވުރެ ގިނަ މީހުންގެ ގެދޮރު ދޫކޮށް ދިއުމަށް މަޖުބޫރުވެއްޖެ އެވެ.
ސްރީލަންކާގެ ރެސްކިއު ޓީމުތަކުން މިއަދު ބުނެފައި ވަނީ، މިހާރު އިންޑިއާއާ ދިމާއަށް ދަތުރުކުރަމުންދާ ބާރުގަދަ ތޫފާނުގެ ސަބަބުން ބޯކޮށް ވާރޭ ވެހުމުން، ފެންބޮޑުވުމުގައި ހަތަރު ކުއްޖަކު ގެއްލިފައިވާ ކަމަށެވެ. އަދި އިތުރު ހަތަރު މީހަކުވެސް ގެއްލިފައިވާ ކަމަށެވެ.
އިންޑިއާގެ މޫސުމާ ބެހޭ އޮފިޝަލުން ބުނީ ހުޅަނގު ދެކުނު ބޭ އޮފް ބެންގޯލް ގައި އުޅޭ ޑިޕްރެޝަން ތޫފާނަކަށް ބަދަލުވެދާނެ ކަމުގެ "ފުރުސަތު" އެބައޮތް ކަމަށެވެ. މި ތޫފާނަކީ އެހެން ސަރަހައްދުތަކަށް އަންނަ ފަދައިން، މި ސަރަހައްދުގައި ވެސް ގަވާއިދުން ކުރިމަތިވާ އަދި އެކަމުގެ ސަބަބުން މީހުން މަރުވާ ފަދަ ނުރައްކަލެއް ކަމަށް މޫސުމާ ބެހޭ އިދާރާތަކުން ބުނެއެވެ.
ސްރީލަންކާގެ އައްސޭރިފަށުން ދުރަށް ޖެހި، މިހާރު އުތުރަށް ދަތުރުކުރަމުން ދަނީ އިންޑިއާގެ ދެކުނު ތަމިލް ނާޑޫ ސްޓޭޓާ ދިމާއަށެވެ. އިންޑިއާގެ މޫސުމާ ބެހޭ އިދާރާއިން ބުނަނީ، ހޮނިހިރު ދުވަހުގެ ހެނދުނު އިންޑިއާގެ ދެކުނު ތަމިލް ނާޑޫ އާއި ޕުޑުޗެރީގެ އައްސޭރިފަށަށް އަރާނެ ކަމަށް ލަފާކުރެވޭ ކަމަށެވެ. މި ޠޫފާނުގައި، ގަޑިއަކު 70 ކިލޯމީޓަރުގެ ބާރުމިނުގައި ވައިޖެހޭނެ ކަމަށެވެ.
ސްރީލަންކާގެ ޑިޒާސްޓާ މެނޭޖްމަންޓް ސެންޓަރުން ބުނީ 276،000 އެއްހާ މީހުން ދަނީ ބަންޑާރަ އިމާރާތްތަކުގައި ވަގުތީ ހިޔާވަހިކަން ހޯދަމުން ކަމަށެވެ. އަދި ރިލީފް އޮޕަރޭޝަންތަކުގައި އެހީތެރިވުމަށް ސަރުކާރުން ވަނީ ސިފައިންގެ ކިބައިން އެދިފައެވެ.
