ހއ. އިހަވަންދޫ ކައުންސިލުން މިއަދު ހާމަކުރި ގޮތުގައި، އިހަވަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި ބިޒްނަސް ސެންޓަރ ކޯޕަރޭޝަން ގުޅިގެން "އިހަވަން ހިޔަލަ އެކްސްޕޯ" ގެ ނަމުގައި ކަނބަލުންނަށް ޚާއްޞަ މައުރަޒެއް ބޭއްވުމަށް ވަނީ ހަމަޖެހިފައެވެ.
މި މައުރަޒު އަމާޒުކުރެވިފައިވަނީ މަސައްކަތްތެރިކަމާއި، ރަށުގައި އުފައްދާ ކާބޯތަކެއްޗާއި، އެހެނިހެން ތަފާތު އުފެއްދުންތަކަށެވެ. މި މައުރަޒު ބޭއްވުމުގެ މައިގަނޑު މަޤްޞަދަކީ އިޤްތިޞާދުގެ ހިއްސާދާރުންގެ މަސައްކަތްތައް ބަލައިގަނެ، އެފަދަ ފަރާތްތަކަށް އިތުރު ފުރުޞަތުތަކެއް ހޯދައިދިނުމެވެ. މީގެ އިތުރުން، އެންމެ ކުދި، ކުދި އަދި މެދުފަންތީގެ ވިޔަފާރިތަކުން އުފައްދާ ބާވަތްތަކާއި، ގެވެށި މަސައްކަތްތެރިންގެ ހުނަރު އަދި އެހެނިހެން ދާއިރާތަކުގެ ފަންނުވެރިންގެ މަސައްކަތްތައް ޢާންމުންނަށް ދެއްކުމަށްވެސް މި މައުރަޒުން ފުރުޞަތު ލިބިގެންދާނެއެވެ.
މި މައުރަޒުގައި ބައިވެރިވުމަށް ޝައުޤުވެރިވާ ފަރާތްތަކަށް މިއަދު 3 ޑިސެންބަރު 2024 އިން ފެށިގެން ފުރުޞަތު ހުޅުވާލައިފިއެވެ. މައުރަޒު ކުރިއަށްދާނީ 21 ޑިސެންބަރު 2024 އިން 22 ޑިސެންބަރު 2024 ގެ ނިޔަލަށެވެ. ބައިވެރިވުމަށް އެދޭ ފަރާތްތަކުން 10 ޑިސެންބަރު 2024 ގެ ކުރިން އޮންލައިން ފޯމެއް ފުރިހަމަކުރަންޖެހޭނެއެވެ.
މައުރަޒުގައި ހިމެނޭ މައިގަނޑު ދާއިރާތަކުގެ ތެރޭގައި ފެހުމުގެ ދާއިރާ، ކޭކް ޑެކަރޭޝަން އަދި ޕޭސްޓްރީ، މޭކަޕް އާޓް، ފޮޓޯގްރަފީ، އާޓް އެންޑް ކްރާފްޓް އަދި އެކި ބާވަތްތަކުގެ ތައްޔާރީ ކާނާ އުފެއްދުން ހިމެނެއެވެ.
މި މައުރަޒަކީ އިހަވަންދޫގެ އަންހެނުންނަށް އެމީހުންގެ ހުނަރާއި ޤާބިލުކަން ދައްކާލުމުގެ މުހިންމު ފުރުޞަތެއް ކަމަށް އިހަވަންދޫ ކައުންސިލުން ފާހަގަކޮށްފައިވެއެވެ. އަދި މިފަދަ މައުރަޒުތަކުން ރަށުގެ އިޤްތިޞާދަށް ފައިދާކުރާނެ ކަމަށްވެސް އުންމީދުކުރެވެއެވެ.
