ކ. ހިންމަފުށީގައި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ ޚިދުމަތް ރަސްމީކޮށް ފައްޓަވައިދެއްވައިފިއެވެ. މި ޚިދުމަތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ހިންމަފުށީގައި ވެމްކޯގެ ޚިދުމަތް ފެށުމާއެކު، އެ ރަށުގެ ގޭބިސީތަކުންނާއި، ކޮންސްޓްރަކްޝަން ސައިޓުތަކުންނާއި އަދި ވިޔަފާރިތަކުން އުފައްދާ ކުނި ނައްތާލުމުގެ ޚިދުމަތް ވެމްކޯއިން ފޯރުކޮށްދޭނެއެވެ. މިއީ ރަށުގެ ރައްޔިތުންގެ ދިގު މުއްދަތެއްގެ ބޭނުމަކަށް ޙައްލެއް ލިބިގެންދިޔަ ކަމެކެވެ.
ހިންމަފުށީގައި ވެމްކޯގެ ޚިދުމަތް ފެށުމަކީ ރަށުގެ ވެށި ސާފުތާހިރުކޮށް ބެލެހެއްޓުމަށް އެޅުނު މުހިންމު ފިޔަވަޅެކެވެ. އަދި މިކަމުގެ ސަބަބުން ރަށުގެ ތިމާވެށި ރައްކާތެރިކުރުމަށް އިތުރު ބާރެއް ލިބިގެންދާނެ ކަމަށް ބެލެވެއެވެ. މީގެ އިތުރުން، ސަރުކާރުން ޤައުމީ ފެންވަރުގައި ކުނި މެނޭޖްކުރުމަށް ކުރަމުންދާ މަސައްކަތްތަކަށްވެސް މި ޚިދުމަތް ފެށުމުން އެހީތެރިކަން ލިބިގެންދާނެއެވެ.
ވެމްކޯއިން މިހާރު ވަނީ މާލެ ސަރަޙައްދުގެ އިތުރުން އަތޮޅުތަކުގެ ބައެއް ރަށްރަށުގައިވެސް ކުނި މެނޭޖްކުރުމުގެ ޚިދުމަތް ފަށާފައެވެ. މީގެ ތެރޭގައި ހދ. ކުޅުދުއްފުށި، ގދ. ތިނަދޫ އަދި ކ. މާފުށި ހިމެނެއެވެ. އަދި މީގެ އިތުރުން ރިސޯޓުތަކުގެ ކުނި ނައްތާލުމުގެ ޚިދުމަތްވެސް ވެމްކޯއިން ދެމުން ގެންދެއެވެ.
ސަރުކާރުން ވަނީ ރާއްޖޭގެ ރަށްރަށުގައި ދިމާވެފައިވާ ކުނީގެ މައްސަލައަށް ދާއިމީ ޙައްލެއް ހޯދުމަށްޓަކައި ޤައުމީ ޕްލޭނެއް އެކުލަވާލާފައެވެ. މި ޕްލޭންގެ ދަށުން ކުނި އުފެދޭ މަޞްދަރުން ފެށިގެން، ކުނި ނައްތާލުމާ ހަމައަށް ތިމާވެއްޓާ ރައްޓެހި ގޮތަކަށް ކުނި މެނޭޖްކުރުމުގެ މަސައްކަތް ކުރިއަށް ގެންދިއުމަށް ވަނީ ރޭވިފައެވެ.
