އެމެރިކާ ސިފައިންގެ މޮޅުކަން ދެއްކުމަށް ޕްރޮޕެގެންޑާ ފިލްމުތައް ކުޅޭ ހޮލީވުޑްގެ ސުޕަސްޓާ ޓޮމް ކްރޫޒް އަށް އެމެރިކާގެ ނޭވީން ޝަރަފުވެރި އިނާމެއް ދީފިއެވެ. މި އިނާމަކީ، އެމެރިކާގެ ކަނޑުގެ ސިފައިންގެ ފަރާތުން އޭނާއަށް ދީފައި ވަނީ އެމީހުންގެ މަދަނީ އެންމެ މަތީ ޝަރަފު ކަމަށްވާ ޑިސްޓިންގިޝްޑް ޕަބްލިކް ސާވިސް (ޑީޕީއެސް) އެވޯޑެވެ.
މި އެވޯޑް ދީފައި ވަނީ ލަންޑަނުގައި ބޭއްވި ރަސްމިއްޔާތެއްގައެވެ. އެމެރިކާގެ ނޭވީގެ ސެކްރެޓަރީ ކާލޯސް ޑެލް ޓޯރޯ ވަނީ، ކުރޫޒްގެ ފިލްމީ މަސައްކަތްތަކުގެ ތެރެއިން އެމެރިކާގެ ނޭވީއަށް އަގުހުރި ޚިދުމަތްތަކެއް ކޮށްދީފައި ކަމަށް ބުނެފައެވެ. އަދި އޭނާގެ މަސައްކަތުން އެމެރިކާގެ ނޭވީ އަދި މެރިން ކޯގައި ހިދުމަތް ކުރުމަށް އެތައް ޖީލުތަކަށް އޭނާގެ މަސައްކަތުން ހިތްވަރު ލިބުނު ކަމަށްވެސް ބުނެފައި ވެއެވެ.
ފިލްމީ ދާއިރާގައި ކްރޫޒް ކުރި މަސައްކަތުން "ނޭވީގެ މަތީ ތަމްރީނު ލިބިފައިވާ މުވައްޒަފުންނާއި ޔުނީފޯމްގައި ތިބެގެން އެމެރިކާ ސިފައިން ވަމުންދާ ގުރުބާނީތަކަށް އާންމުން ހޭލުންތެރިކޮށް، އާންމުންގެ އަގުވަޒަން ކުރުން އިތުރުވި" ކަމަށް ވެސް އެމެރިކާ ކަނޑުގެ ސިފައިން ބުނެފައި ވެއެވެ.
ޓޮމް ކުރޫޒަކީ، ސައިންޓޮލޮޖީ ދީނަށް ތަބާވާ އަދި އެދީން ޕްރޮމޯޓު ކުރުމަށް މަސައްކަތް ކުރާ މީހެކެވެ.
