މަގުމަތީގައި ވީއްލިގެން އުޅޭ ބުޅާތައް އަނިޔާވެރިކޮށް މަރަމުންދާކަމުގެ ޝަކުވާ ލިބެމުން އަންނަ ކަމަށާއި ބުޅާތައް މިގޮތަށް ނުމެރުމަށް ދަނޑުވެރިކަމާއި ދިރޭތަކެއްޗާބެހޭ ވުޒާރާއިން އިލްތިމާސްކުރައްވައިފިއެވެ.
މަގުމަތީގައި ވީއްލިގެން އުޅޭ ބުޅާތައް މަރާކަމުގެ ޝަކުވާތައް ލިބެމުންދާތީވެ، އެކަމާ ގުޅިގެން ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ނެރެފައިވާ ބަޔާނުގައި ބުނީ މާތްވެގެންވާ އިސްލާމް ދީނުގައި ދިރޭތަކެއްޗަށް ރަޙުމުކޮށް، އަޅާލައި، އޯގާތެރިވުމަށް ބާރުއަޅުއްވާފައިވާ ކަމަށެވެ. ވީމާ، ރާއްޖޭގައި އުޅޭ އެއްވެސް ޖަނަވާރަކަށް އަނިޔާވެރިވުމާއި ނޭދެވޭ އެންމައި ކަންކަން ކުރުމުން ދުރުވެ، އެތަކެއްޗަށް އަޅާލައި އޯގާތެރިވުމަކީ އެ ވުޒާރާގެ ވަރަށް ބޮޑު އެދުމެއް ކަމަށެވެ.
ބުއްދިއެއްނުވާ އެއްޗަކަށްވާތީ ޖަނަވާރުންގެ ފަރާތުން އިންސާނުންނަށް އުނދަގޫތަކެއް ކުރިމަތިވުމަކީ އެކަށީގެންވާކަމެއް ކަމަށާއި ނަމަވެސް އެއީ އެ ތަކެއްޗަށް ގޯނާކުރަން ލިބޭ ސަބަބެއް ނޫންކަމަށާއި، އަދި އެފަދަ ކަމެއްކުރުމަކީ އިންސާނިއްޔަތާވެސް ޚިލާފު ޢަމަލެއްކަން އެ ވުޒާރާއިން ނެރުނު ބަޔާނުގައި ބުނެފައިވެއެވެ.
ވުޒާރާގެ ބަޔާނުގައި އިތުރަށް ބުނެފައި ވަނީ ދުނިޔޭގެ ޖަނަވާރުންގެ ޞިއްޙަތާބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުންގެ ދުޅަހެޔޮކަމަށް ޚާއްޞަ އަހައްމިއްޔަތުކަމެއް ދީފައިވާ ކަމަށެވެ. ރާއްޖެއަކީ ޖަނަވާރުންގެ ޞިއްޙަތާބެހޭ ޖަމިއްޔާގައި ބައިވެރިވެފައިވާ ގައުމެކެވެ.
