އިންޑިއާގެ ފޮރިން ސެކްރެޓަރީ ވިކްރަމް މިސްރީ މޮރިޝަސްއަށް ކުރައްވާ ފުރަތަމަ ރަސްމީ ދަތުރުފުޅުގައި އެ ގައުމުގެ ބޮޑު ވަޒީރާ ބައްދަލު ކުރައްވައިފިއެވެ. މި ދަތުރުފުޅަކީ ދެގައުމުގެ ދެމެދުގެ މަތީ ފެންވަރުގެ ގުޅުންތައް ކުރިއަށް ގެންދިއުމުގެ ބައެއް ކަމަށާއި، އަދި މިއީ، އިންޑިއާއާއި މޮރިޝަސްއާ ދެމެދު އޮންނަ ގުޅުމަށް ނިއުދިއްލީން ދޭ މުހިންމުކަން ދައްކުވައިދޭ ދަތުރެއް ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން ބުނެއެވެ.
އިންޑިއާގެ ނެއިބަރހުޑް ފަސްޓް، އަދި ވިޝަން ސާގާރުއާއި އެފްރިކާ ފޯވާޑްގެ ނަޒަރިއްޔާތާއި ސިޔާސަތުތަކާއެކު ދުނިޔޭގެ ދެކުނު ބިތުގެ ޤައުމުތަކާއެކު އިންޑިއާއިން ދަނީ ގުޅުން ބަދަހި ކުރަމުންނެވެ. މޮރިޝިއަސްއާއި އިންޑިއާއަކީ އިންޑިއާ ކަނޑު ޙިއްސާ ކުރާ ދެގައުމުވެސް މެއެވެ.
މޮރިޝަސްގެ ބޮޑުވަޒީރާއެކު ބޭއްވެވި ބައްދަލު ކުރެއްވުމުގައި އިންޑިއާގެ ފޮރިން ސެކްރެޓަރީ ވަނީ އާންމު އިންތިޚާބުގައި ބޮޑު ވަޒީރު ރަމްގޫލަމް ހޯއްދެވި ކާމިޔާބީއަށް މަރުހަބާ ވިދާޅުވެފައެވެ. އަދި އިންޑިއާއަށް ޒިޔާރަތް ކުރެއްވުމަށް އެދި ވަޑައިގެން އިންޑިއާގެ ބޮޑުވަޒީރު މޯދީ ރަމްގޫލާމަށް ދެއްވި ދައުވަތުވެސް މަސްރީ ވަނީ ތަކުރާރު ކުރައްވާފަ އެވެ.
ދެ ބޭފުޅުން ވަނީ ދެ ޤައުމުގެ ގުޅުމުގެ ހުރިހައި ދާއިރާތަކެއް ވަށާ ޖެހޭ ގޮތަށް މަޝްވަރާ ކުރައްވާފައެވެ. އަދި ދެ ގައުމުގެ ހާއްސަ އަދި ގާތް ޕާޓްނަޝިޕް އިތުރަށް ހަރުދަނާ ކުރުމަށް ކުރިއަށް ކުރަން ހުރި ކަންކަމާ ބެހޭ ގޮތުންވެސް ފޮރިން ސެކްރެޓަރީ އިރުޝާދު ހޯއްދެވި ކަމަށް އިންޑިއާގެ ފޮރިން މިނިސްޓްރީން ބުނެއެވެ.
