ސޫރިޔާގެ މުސްތަގްބަލާ ބެހޭގޮތުން ނޫސްވެރިންނާ ވާހަކަ ދައްކަމުން ހަނގުރާމަވެރިންގެ ލީޑަރު އަބޫ މުހައްމަދު އަލްޖައުލާނީ ބުނެފައި ވަނީ ސޫރިޔާގެ ސިފައިންގެ ސަފުތައް އެއްކޮށް ރޫޅާލާނެ ކަމަށާއި އަދި ސިފައިންގެ ތެރެއަށް އިދްލިބްގެ ސަރުކާރުގެ ހައިއަތު ތަހުރީރުއް ޝާމަށް ހަނގުރާމަކޮށްދިން، ހަނގުރާމަވެރިން ވައްދައިގެން އައު ލަޝްކަރެއް ބިނާ ކުރާނެ ކަމަށެވެ. އަދި އޭނާ ބުނެފައި ވަނީ ބިދޭސިން އޭނާގެ ލަޝްކަރާއެކު ހަނގުރާމަކޮށްފައިވާތީ އެކަމަށް ޝުކުރު ވެރިވާ ކަމަށާއި ބޭރުން އައިސް ހަނގުރާމަ ކުރި މީހުންނަށް ސޫރިޔާގެ ރަށްވެހިން ދީގެން އެމީހުންވެސް ސިފައިންގެ ތެރެއަށް ވައްދާނެ ކަމަށެވެ.
ނޫސްވެރިން ވަނީ، އޭނާގެ ހެދުން އެކި ފައްތަރުގައި އެކި ގޮތްގޮތަށް ބަދަލުވެފައިވާ ގޮތާ ބެހޭ ގޮތުން ސުއާލު ކޮށްފައެވެ. ޖައުލާނީ ބުނެފައި ވަނީ ކޮންމެ ކަމަކަށްވެސް އެކަމަށް އެކަށީގެންވާ ހެދުމެއް އޮންނާނެ ކަމަށެވެ. އަދި އެކަމެއް ނިމި އޭގެ ވަގުތު ދިއުމުން އެ ހެދުން ބަދަލު ކުރަން ޖެހޭނެ ކަމަށެވެ.
ޖައުލާނީ ބުނެފައި ވަނީ އޭނާއާއި ބައިވެރިން އެންމެ މުހިންމު ކަމެއް ދެނީ، ގާނޫނުއަސާސީއެއް އެކުލަވާލުމަށާއި ގާނޫނުތައް އަލުން އެކުލަވާ ލުމަށެވެ. އަދި އެކަން އެތައް ކޮމިޓީއަކުން މިހާރު ކުރަމުންދާ ކަމަށްވެސް ކިޔައި ދިނެވެ.
ޖައުލާނީ ބުނެފައި ވަނީ ސޫރިޔާގެ 60 އަހަރުގެ ތެރޭ ހައްލު ނުކުރެވި ހުރި މައްސަލަތައް އޭނާގެ ހައިއަތު ތަހުރީރުއްޝާމް އިން 11 ދުވަސްތެރޭގައި ކޮށް ނިންމައި ސޫރިޔާ ސާފުކޮށްފައި ވާނެ ކަމަށެވެ. އަދި ރެފިއުޖީންނަށް ވި މީސްމީހުންނަށް ގެދޮރު ބިނާކޮށްދޭނެ ކަމަށްވެސް އޭނާ ބުންޏެވެ.
