ސޫރިޔާގެ މަޚުލޫޢު ރައީސް ބައްޝާރުގެ މަސްއޫލުވެރިންނާ އެކު އިޒްރޭލުން ވަޓްސްއެޕް މެސެޖުތައް ބަދަލުކޮށްފައިވާ ކަން ބޭޒާރު ވެއްޖެއެވެ. ސޫރިޔާގެ ޖާސޫސީ އިދާރާގެ ފައިލްތައް އަތު ޖެހުމުން ޖައުލާނީގެ ހަނގުރާމަވެރިން ވަނީ އެ މެސެޖުތަކުގެ ކޮޕީތައް އެމީހުންގެ ޓެލެގްރާމް ޗެނަލްތަކަށް ފާއްދާލާފައެވެ.
އިޒްރޭލްގެ ޔެޑިއޮތު އަހްރޮނޮތު ނޫހުން ވަނީ އިޒްރޭލުގެ ޖާސޫސީ އިދާރާގެ ފަރާތްތަކާއި ބައްޝާރުގެ އިންޓެލިޖެންސް މަސްއޫލުވެރިންނާ ދެމެދު މިފަދަ މުއާމަލާތްތައް ވަޓްސްއެޕް މެދުވެރިކޮށް ހިނގާފައިވާ ކަން ކަށަވަރުކޮށްދީފައެވެ.
ވަޓްސްއެޕްގައި ޒަޔަނިސްޓުންގެ ޖާސޫސުން ސޫރިޔާގެ ފަރާތްތަކާ މުއާމަލާތުކޮށްފައިވަނީ "މޫސާ" ގެ ނަމުންނެވެ.
ޒަޔަނިސްޓުން ސޫރިޔާއަށް ވައިގެ މަގުންދޭ ކޮންމެ ހަމަލައަކަށް ފަހު މޫސާ ވަނީ އެހަމަލަ ދީފައިވާ ސަބަބު ސޫރިޔާއަށް ސާފުކޮށްދީފައި ކަމަށް ވެއެވެ. އަދި ހިޒްބުﷲއަށް ހަތިޔާރު ސަޕްލައި ކުރިޔަ ނުދިނުމަށާއި އީރާނަށް ސޫރިޔާގައި ފުރުސަތު ނުދިނުމަށް އެދިފައި ވެއެވެ. އަދި ސޫރިޔާއިން އީރާން ދޫކޮށްލައިފިނަމަ ދިމިޝްޤާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށް އެހީވާނެ ކަމަށްވެސް މޫސާ ބުނެފައި ވެއެވެ.
އިޒްރޭލު ނޫހުން ބުނެފައި ވަނީ ބައްޝާރުގެ މަސްއޫލުވެރިންނާ ދެމެދު މި މުއާމަލާތު ކުރެވެން ފެށުނީ ރަޝިޔާގެ މެދުވެރިވުމާ އެކުގައެވެ.
ސޫރިޔާގެ ޖާސޫސީ އިދާރާއިން ވަނީ މި މެސެޖުތައް ޕްރިންޓުކޮށް، ދިފާއީ ވަޒީރަށާއި ދާޚިލީ ކަންކަމާ ބެހޭ ނާއިބް ރައީސް އަލީ މަމްލޫކަށާއި އިތުރު އިސް މަސްއޫލުވެރިންނަށް ފޮނުވާފައި ހާމަވެއެވެ.
